Ujor mukotduma hi ka ïingbishar HC ïa ka kam khaïi be-aiñ ïa ki marpoh khyndew sha Bangladesh

Shillong, Iaiong 22 : Ka ïing Bishar High Court jongka jylla ha ka sngi Ba-ar, ka la ujor mukotduma suo motu hi halor ka kam khaïi beaiñ ïa ki maw bad kiwei ki mar poh khyndew sha Bangladesh, bad pynmih ruh ïa ka jingbthah ba shipor ban pynthikna ba ym dei ban don ki kali kit marpoh khyndew kiba ïaid khlem ki kot ki sla kiba biang.
Ka Division Bench ka Chief Justice Revati Mohite Dere bad Justice HS Thangkhiew ka la register PIL halor ka shithi ba 15 tarik Iaiong 2026, ba pynpaw ïa ka jingsngew ba kan don ka jngktah kaba jur namar bun ki kali heh, kynthup ki trok kit mar bad ki trok dumper ki la khaïi maw bad kiwei ki marpoh khyndew sha khappud Bangladesh khamtam na ka surok National Highway-206, kaba pynheiñ ïa ka aiñ.
Haba pynmih ïa ka jingbthah ba shipor, ka ïing Bishar kala hukum ïa ki bor ba dei khmih ba kin pynthikna ba ym dei ban don ki kali kiba ïaid lyngba ki Land Custom Station bad ka khyrdop talasi ka Tnad Forest khlem ka Mineral Transport Challan kaba treikam bad kiwei kiwei ki kot ki sla kiba donkam, kiba long ruh kat kum ki nombor kali jong ki trok.
Ki kali kiba la shem khlem ki kot ki sla kiba biang, dei ban kurup ha ryngkat bad ki marpoh khyndew, kat kum ka aiñ, ong ka ïing Bishar
Ka la bthah ruh ba ki kali ba khaïi ïa ki marpoh khyndew ki dei ban don ruh ïa ki fitness certifictate bad ki PUC ba treikam bad bthah ïa ki bor khmih ba kin pynlong ïa ka jingtalasi ban pynshisha ba ki marpoh khyndew ki dei kiba la tih tang na ki jaka ba don licence.
La hukum ruh ban bud pyrrkhing ïa baroh ki Aiñ, ki rules bad ki kyndon ba ïadei bad ka jingkhaïi ïa ki marpoh khyndew.
Ka ïing Bishar ka la pynpaw ba ka shithi ba kynnoh khaïi ïa ki maw bad kiwei ki mar poh khyndew ki la jia khlem da ïaid kat kum ki lynti ba dei bad ba pynkheiñ ïa ki aiñ, bad ba ki kali kiba khaïi ïa ki maw bad ki marpoh khyndew ki dei ki bym don satia ïa ki nombor plate.
Ha kane ka shithi la ai lang ruh ïa ki dur bad ki video kum ki sakhi.
Ka shithi ka ïathuh ruh ïa ka jingsngewkhia haba ïadei bad ka jingkynnoh tih beaiñ bad khaïi beaiñ ïa ki mar poh khyndew, kaba la pynjulor ïa ka surok paidbah namar ka jingïaid ki kali heh, kaba ktah jur ruh ïa ka jingim ki trai shnong bad pynjot bad pynjulor ïa ka mariang, kaba ym lah satia ban siew pat ha kano kano ka rukom.
“Ka jingpynpaw ba la pynsngew ha kane ka shithi ki dei kiba lah ban ïohi bad kiba shisha” ong ka ïing Bisharha ka hukum.
Ka la pynpaw ba ka jingtih par ha ka jingshisha ka dei ban pyrrkhing na ki jaka kiba idon jingktah (50 meter na ki shnong,ki highway bad ki tyllong um) bad ki donkam ïa ka jingbit na ka Forest/Wildlife ha ki jaka bala ithuh kum ki khlaw.
“Ka dei ka kam kaba sngewkhia jur ba la shah ïa ki trok/dumper ba kin ïaid khlem ki nombor kali lane khlem da talasi ïa ki kot ki sla kiba donkam ban kit ïa ki marpoh khyndew” ong ka hukum.
Ka ïing Bishar ka la hukum ban pynlong mamla ïa kiba bun ki kynhun, kynthup ka Sorkar Jylla, ka Tnad Mining & Geology, Directorate of Mineral Resources, Tnad Transport, Tnad Forest, ki Bor District bad Pulit, ka Meghalaya State Pollution Control Board, Tnad Revenue & Taxation, ka Sorkar India, Commissioner of Custom, Ministry of Environment, Forest and Climate Change bad ki Border Security Force. La phah ruh ïa ka jingpyntip sha baroh kine ki kynhun.
Ka ïing Bishar ka la bthah ïa u Advocate General ba un shim jingbthah haba ïadei bad ka policy ha ka ban khaii ïa ki marpoh khyndew, khamtam u mawshun, haba shimkhia ïa ka jingktah ba ka jingtih ïa une u mar poh kyndew kan long ïa ka mariang, ka bym lah satia ban ïapeiñ.