Ïaibteng ïa ka mynsiem jingïatreilang ha baroh ki kam, kyntu u Sahep rangbahduh ka PHE ïa ki paidbah

Mawkyrwat, Ïaïong 17: U Bah R.S. Nongbri uba dei u Chief Engineer (CE) jong ka PHE Meghalaya, Shillong, ha ryngkat bad u Bah K. Nongbsaw uba dei u Executive Engineer ka PHE Mawkyrwat Division bad kum u Member Secretary ka DWSM (JJM), South West Khasi Hills District, ki la leit jurip ïa ka jaka pynlang um ne ka Treatment Plant jong ka Laitnong Combined Water Supply Scheme (LCWSS) ha shnong Jashiar, South West Khasi Hills District.
Ha kane ka jingïakynduh lang bad ki paidbah shnong, u Bah R.S. Nongbri u la ai jingïaroh ïa ka shnong baroh kawei halor ka jingkiew shaphrang bad pyntyllun shakhmat halor ki kam kaba ïadei bad ka umbam umdih da kaba pynpaw ba kane ka dei lyngba ka jingdon jong ki ïa ka jingïatreilang na ka bynta ban poi sha ka jingjop, bad lada kim don ïa kane, yn ym lah ban poi sha ki thong.
Ym tang katta, u la kyntu ïa ki paidbah shnong ba kin ïai bteng ïa ka mynsiem jingïatreilang ha baroh ki kam, namar ka long ka jingdonkam kaba kongsan bad ban pynlong ïa ki projek ba kin ïaid beit ïaid ryntih.
Lah ban kdew ruh ba kane ka jingwan jong u Bah R.S. Nongbri uba dei u Chief Engineer jong ka PHE Meghalaya, Shillong sha shnong Jashiar ka long hadien ba ka Kong Elitamarry Lyngdoh kawei na ki longkmie jong kane ka shnong, ka la leit shim ïa ka khusnam na ka President jong ka Ri India ha ka 11 tarik u Lber, 2026, hadien ba ka la jop ha ka kyrdan ba nyngkong ha ka bynta “Women Demonstrating Excellence in FTK-Based WQMS”.
Ha kane ka jingjurip la synranlang ruh da ki Sub Divisional Officer jong ka Mawkyrwat bad Ranikor Block, kata u Bah I. Kharbuson, SDO Mawkyrwat bad u Bah F. Thongni, SDO Ranikor, lem bad kiwei pat ki ophisar.
Hadien ka jingjurip, la pynlong ruh ïa ka jingïalang ba lyngkot bad ka jingleh burom ïa ka shnong Jashiar bad kumjuh ruh ïa ka Kong Elitamarry Lyngdoh. Ha kane ka prokram la donlang u Bah K. Khonglah, Additional Chief Engineer PHE Zone III, Shillong, u Bah D. Shabong, Superintending Engineer Monitoring Cell, Shillong, bad u Bah L. Dhar, Superintending Engineer Western Nongstoiñ.