Shillong, Ïaïong 17: U Rangbah shnong jong ka shnong Kewri bad ka shnong Khangklak (SWKH) ki la ujor lang ba ha ka 12 tarik mynta u bnai, ki runar bym lah ban ithuh ki la tuh ïa 2 tylli ki JJM iron pipe kiba shongdor kumba T. 8,600/- napoh ka shnong.
Ha kawei pat ka jingjia, u Bah Kermiki Pdang u la phah ka jingujor ba ha ka miet jong ka 14 tarik mynta u bnai, ki runar bym lah ban ithuh ki la tuh kawei ka Mahindra pick-up kaba don u nombar MZ-06-2818 kaba la long trai da u ba shipara bad u uba na ka shnong Dkhiah West (EJH).
Shuh shuh ki pulit ki la ïathuh ba u Bihun N Marak u la ujor ba ha ka 15 tarik mynta u bnai ha ka por nohphai sngi, uwei u briew bym lah ban ithuh u la shim ïa ka thuk thuk jong u kaba don u nombar AS-16D-0984 napoh ka shnong Warimagre (EGH), halor ka jingai daw ba u thmu ban leit sha ïew, hynrei u khlem wan pynphai shuh ïa katei ka thuk thuk jong u.
