Ha ka RDA yn ïa kren ka HSPDP ban rai halor u kyrtong bad elekshon MP Lok Sabha
Pdiang sngewbha ïa ka Women’s Reservation Bill
Shillong, Ïaiong 17 : Ki Nongïalam jong ka Hill State People’s Democratic Party (HSPDP) ha ka sngi Thohdieng ki la ïathuh ba haduh mynta kim pat don kano kano ka rai haba ïadei bad ka elekshon MP sha Lok Sabha hadien ka jingkhlad kyndit noh u MP ka VPP Dr.Ricky AJ Syngkon ha u Rymphang mynta u snem.
“Ïa kane ka mat ngin sa kren lang ha ka Regional Democratic Alliance (RDA) bad ngin sa ïa rai,” ong u President ka HSPDP Bah KP Pangniang haba kren bad ki lad pathai khubor. Ha kajuh ka por u la ïathuh ruh ba na ka liang ka party kan sa khot ïa ka jingïalang jong ka Central Executive ban ïathir bad ïatai sani bha.
Haba jubab halor ka jingkylli, u la ïathuh ba watla ka party ka don lang ha ka sorkar synrop hynrei haduh mynta hi kim pat don kano kano ka jingïakren ha ka sorkar Meghalaya Democratic Alliance (MDA) haba ïadei bad kane ka ishu.
“Kumba ka long haduh mynta hi ngim pat don ka rai, ïano ban kyrshan bad ïano ban pynmih bad kumno ngin ïa trei ha kane ka elekshon MP,” u la bynrap shuh shuh.
U President u la ïathuh ruh ba na ka liang ka RDA ki la don ruh ka jingkynduh ha ka taiew ba la dep ha kaba ka la don ka jingïapyrkhat ban don biang ka jingïakynduh.
Shuh shuh u la ong ba hadien ba ki la kynduh biang ha ka RDA kum ka party kin sa shong pat pyrkhat para ma ki ban shim ïa ka rai.
Lah ban kdew hangne ba ka Regional Democratic Alliance ka dei ka kynhun synrop jong ki ar tylli ki party riewlum ba kynthup ïa ka United Democratic Party (UDP) kaba don haduh 12 ngut ki MLA bad ka HSPDP kaba don arngut ki MLA.
Ha kawei pat ka liang, u President ka party u la ong ba kum ka party hi ki pdiang sngewbha ïa ka Women’s Reservation Bill kaba la wanrah da ka sorkar pdeng ban plie lad khambun ïa ki kynthei ban don kum ki nongmihkhmat paidbah.