IFL 2025-26: Mynta yn aireng ka Lajong ïa ka Aizawl ha ka jingïalehkai ba khatduh jong ka Stage 1

Shillong, ïaïong 17: Ka Shillong Lajong FC kan pynkhreh ïa ka jingïalehkai North East Derby ha SSA Stadium, ha kane ka sngi Saitjaiñ (18 tarik ïaïong) ha kaba kan aireng pyrshah ïa ka Aizawl FC ha ka wat ïakhun ba 9 jong ka lympung Indian Football League 2025-26, ban sdang ha ka por 6:30 baje janmiet.
Kane kan dei ka jingïalehkai kaba khatduh na ka bynta baroh arliang ha ka Stage 1 jong ka IFL. Ka Lajong kaba wan ha ka kyrdan kaba saw ha ka miej ka la dep ban pynthikna ïa ka jaka ha ka Championship Round jong ka Stage 2 hynrei na ka bynta ka Aizawl kane ka jingïakhun kan long kaba kongsan.
Ka Lajong kan jam sha kane ka jingïakhun hadien san tylli ki jingïalehkai kiba seisoh shabar nala ïing, da kaba khur lai tylli ki jingjop, ïakhaid bad rem shi sien. Katba ka Aizawl, kam shym la jop satia ha ki lai tylli ki jingïalehkai ba la dep watla ka la sdang ïa ka samoi ha ka rukom kaba bha.