ïakynduhlang ki Rangbah Shnong Ri-Bhoi halor shibun ki mat kynthup ka bording, ka umbam, ki mrad ba nabar jylla

Nongpoh, Ïaïong 16: Ka Synjuk ki Rangbah Shnong Ri-Bhoi District mynta ka sngi kila lum da ka jingïalang (Executive Committee) ha Saiden ban ïathir halor shibun ki jingeh jong ki shnong ki thaw bad khamtam bun tylli ki mat kiba ktah ïa ka bha ka miat bad ka jingim jong ki paidbah ha ka thaiñ.
Ha ka jingïakren bad ki lad pathai khubor, naka liang u Bah PB Sylliang Secretary ka Synjuk haka jingdonlang u Bah BB Makdoh Chairman lem bad ki nongïalam shnong ki la ong ba ki pyrshah ïa ka jingthmu jong ka sorkar ban khot tender na ka bynta ka jingpynpoi ïa ki tiar ban tei ïa ki projek hapoh ka skhim MNREGS. Ki la ban jur ba ka sorkar ka dei ban pynneh beit kumba ju long, ha kaba ki dukan ban shim tiar ki dei ban long katkum ka jingmynjur jong ka VEC. Ki la maham ruh ba kin ym pdiang ïa kino kino ki tiar lada wanrah lyngba ka tender bad kin sa phah da ka jingthoh ban pynpaw ïa ka jingpyrshah jong ki.
Ha kawei pat ka bynta, ka Synjuk ka la rai ban pynlong ïa ka General Council ha ka 8 tarik u Jymmang 2026 ha Nongpoh, ha kaba la khot bad wer ïa baroh ki nongïalam shnong ban wan poi ryntih ban ïatai halor ki jingeh bad ki bynta kiba ktah ïa ka roi ka par ha ka thaiñ.
Ka Synjuk ka la pynpaw ruh ba ka la ïoh pdiang ïa ka jingujor halor ka jingbuh check gate ha Quinine kaba la wanrah ka jingpynthud ïa ki paidbah. Halor kane, ki nongïalam ki la leit ban kynduh ïa u SP ban pan jingpynshai. Ki la ong ba lada katei ka check gate ka dei tang ban peit ïa ka jingwan rung ki briew, kam dei ban don hapdeng lynti haka shnong Quinine hynrei ka dei ban don ha Byrnihat lane ha Khanapara kaba dei ka jaka mih bad mih ka jylla.
Ha kaba ïadei bad ka jingwan rung laitlan ki mrad kum ki sniang bad ki syiar na shabar jylla, ki nongri jingri ki la pynpaw ïa ka jingud jingnam namar ka jinghiar dor jong ki jingri jong ki. Ka Synjuk ka la ong ba kane ka jingwan rung be-aiñ ka la ktah jur ïa ka kamai kajih bad ka la rai ban phah da ka jingthoh sha u DC bad ki myntri sorkar halor kane ka bynta.
Shuh shuh, la pynpaw ruh ïa ka jingeh ha ka jingpyntreikam ïa ka Jal Jeevan Mission, katba don ki shnong kiba la ïoh jingmyntoi, hynrei don pat kiba mad ïa ka jingïakajia bad jingïapher jingmut ha shnong ha thaw, kaba la pynkulmar ïa ki Rangbah Shnong. Na ka liang ka Synjuk, la rai ban phah da ka jingthoh sha u Myntri Rangbah bad ki ophisar ba dei khmih.
Ha kaba ïadei bad ka Special Intensive Revision (SIR) jong ka Election Commission of India (ECI), ka Synjuk ka la pynpaw ïa ka jingsngewkhia halor ka jingïohsngew ba ka ECI kan ym pdiang shuh ïa ki syrnod shnong ba la ai da ki Rangbah Shnong ne ki Dorbar Shnong ban pynshisha ïa ki nongshong shnong. Ki la ong ba kane ka buh jingma ïa ka jylla rit paid kum ka Khasi bad Jaintia Hills kaba hap hapoh ka Sixth Schedule. Ki la pynpaw ba kim pyrshah ïa ka SIR hynrei ki pyrshah lada ym pdiang ïa ki syrnod shnong.
Shuh shuh ha kaba ïadei pat bad ka bording elektrik, ka Synjuk ka la kynnoh ba ka jingtreikam hapdeng ka tnat MeECL bad ka Synjuk ka long kumba leh khun jakai. Watla la ju ïakren bunsien bad u Myntri ba dei khmih, hynrei ka jingpyntreikam ïa ki smart meter ka la ktah jur ïa ki paidbah duk bad ki la ong ba kane ka long tang ka jingïarap ïa ki contractor ban pyndep kloi ïa ka kam, katba ka bill light jong kiba duk ka long shabneng sha khyndew bad ruh khlem ka bording kaba thikna kumta kila aipor ïaka tnad MeECL ban weng hapoh shi bnai bad maham ba lada ka MeECL ka bteng ban pyntreikam da ka bor, kin sa ai bor ïa ki Rangbah Shnong ban weng noh ïa ki smart meter bad ka MeECL ka dei ban shim ka jingkitkhlieh
Khadduh khatwai, ka Synjuk ka la pynpaw ba ka Ri-Bhoi ka la long kum ka “jaka theh ñiut” bad kyntu ïa ka sorkar ba kam dei ban lehkai bad kila maham ruh ba lada ym shimkhia ïa kine ki mat, kan sa poi ka por ba ka Synjuk kan shim da ki sienjam kiba tyngeh, kynthup wat ban khang ïa ki ophis jong ka MeECL kaba don ha Umiam.