Shillong, ïaïong 15: Ka sienjam kaba san (5th) jong ka lympung Meghalaya State League ka la sdang da ka jingïakhun kaba itynnad bha ha ka Group A ha kaba ka Nongkseh SSCC ka la jop da 2-1 ïa ka Khimusniang SC ha madan First Ground-SSA Stadium, hynne ka janmiet sngi Balang.
U Sheen Sohktung (19’) bad u Hardy Cliff Nongbri (90’+2) ki la pynkhihjar na ka bynta ka Nongkseh katba u Dawanbiangmi Passah (51’) u la pynïakhaid shipor na ka bynta ka Khimusniang.
Kane dei ka sien kaba nyngkong ïa baroh arliang ban ïashim bynta ha kane ka lympung phutbol ba heh tam ha ka jylla baroh kawei, kaba la pynlong da ka Meghalaya Football Association ryngkat ka jingkyrshan na ka Directorate of Sports & Youth Affairs ka Sorkar jylla Meghalaya.
Haba rung sha ka MSL, ka Nongkseh ka la ïoh mad ïa ka samoi kaba khraw ha u snem 2025 hadien ba ka la jop ïa ka nam lahduh jong ka First Division bad ka Champions Cup jong ka Shillong Sports Association, khlem da kdew ïa ka Sikkim Gold Cup ba ka la jop ha u bnai Kyllalyngkot, katba ka Khimusniang ka la rah ïa ka ‘U Kiang Nangbah Division Memorial Trophy’ da kaba jop ïa ka phainal jong ka West Jaintia District Sports Association’s Super Division 2025.
La plie paidbah ïa ka MSL 5 da u Myntri ka tnad ïalehkai jong ka Sorkar Jylla u bah Wailadmiki Shylla kum u Kongsan. Haba ai jingkren shuwa ban sdang ka jingïalehkai, u la ong ba ka MSL ka ailad ïa baroh ki Association bad ki klob ban ïashim bynta ha ka lympung kaba heh, ha kaba ki lahduh ki lah ban jam sha ki lympung jong ka ri bad ban ïalehkai ha ka I-League 3. U la bynrap ba ka tnad ïalehkai ka thrang ban ïohi shibun ki nongïalehkai phutbol na Meghalaya ba kin mihkhmat ïa ka jylla kumjuh ruh ïa ka ri bad ka MSL ka long ka mawjam na ka bynta kane ka lynti.
Ha kaba sdang jong ka jingïakhun dei ka Khimusniang kaba la ïoh ban tehlakam ïa ka bol ban pynbor ïa ka Nongkseh ban hap pynskhem bha shadien na ka por sha ka por, khamtam lei lei ha ka liang kadiang namar ka Khimusniang ka don ïa u Dawanbiangmi uba la ïalehkai bha.
Hynrei ka jingdon ki rangïalehkai kiba la kham shemphang ka Nongkseh ka la nang ïohbor naduh ka minit kaba 10 bad ha ka minit kaba 19 u Sheen u la ïohlad ban thep ïa ka kol kaba nyngkong. Baroh ki kabu kiba dang sah ha ka kylla step ki dei jong ka Nongkseh, ha kaba ki jingpyrshang jong u Shano Tariang bad u Chesterpaul Lyngdoh ki la lait sharud. Nangta ka kabu kaba paka na u Shano ha ka minit kaba 26 ka la shah kyntait ha u Daemitre Dan ban khanglad ïa ka Nongkseh ban thep ïa ka kol kaba ar.
Kumba ki la leh ha ka kylla step, ka Khimusniang ka la sdang da kaba tyngeh ïa ka kylla miet. Ka jingbakla kaba tang khyndiat na ki nongïadien jong ka Nongkseh ka la plie lad ïa kane ka kynhun na West Jaiñtia ha kaba u Dawanbiangmi u la ïoh ban pynïakhaid ïa ka jingïalehkai ha ka minit kaba 51.
Hadien nangta ka Nongkseh ka la pynjur ban ñion shakhmat katba ka Khimusniang ka la ïaleh shitom ban ïada tang ban ïakhaid. Ka jingpyrshang kaba khlem sangeh jong ka Nongkseh ka la seisoh ha ki minit pynjlan ba khatduh shuwa ban kut ka por lyngba ka kol na u kapten u Hardy.
Ka prokram ïalehkai jong ka MSL kan bteng biang ha kane ka sngi Palei da hynñiew tylli ki jingïalehkai ban long ha kylleng ka jylla.
Ka prokram ïalehkai ha kane ka sngi (Baroh kin sdang ha ka por 3 baje nohphai sngi):
Group A (Shillong SSA Stadium) – Mawshun SCC pyrshah ïa ka Umkaber SCC
Group B (Shillong MFA Ground) – Nangkiew Irat SC pyrshah ïa ka Mulang SC Nongbah
Group C (Amlarem) – Mawlai SC pyrshah ïa ka Amlarem SC
Group D (Khliehriat) – Thangskai Tiger SC pyrshah ïa ka Ladthadlaboh SC
Group E (Wahiajer) – Shillong Lajong FC pyrshah ïa ka Lumphyrnai Sohphoh FC
Group F (Mairang) – Ym don jingïalehkai
Group G (Williamnagar) – A’chik SCO Rongjeng pyrshah ïa ka Maram FC
Group H (Mawkyrwat) – Rangdajied United FC vs Mawten SC
