Thombor ki Nepali bad jynrat naphang ïa ki jaka rep ki Khasi ha Mawsikar, West Khasi Hills District

Nongstoiñ, Ïaïong 14: Ha ka sngi ba ar kaba dei 14 tarik mynta u bnai, ka kynhun jong ki Nepali kiba don ha ka thaiñ Langpih ki la poi kyndit sha Mawsikar ban jynrat naphang ïa ki jingthung jingtep ba la thung da ki Khasi kiba don ha katei ka shnong.
Na ka liang u Bah Robert Wahlang Organising Secretary VPP Rambrai haba pyntip halor kane sha ki lad pathai khubor, u la ong ba ma u ha ryngkat ka jingdonlang jong u MLA barim ka Nongstoiñ u Bah D.Jyndiang ryngkat kiwei ki riew rangbah, ki la sakhi hi dalade ïa ka jingleh donbor jong ki Nepali ki bym shym la patiaw ne salia ei ei pyrshah ïa ki Khasi kiba don ha ki jaka rep ha Mawsikar.
La ong ruh ba na ka liang ki nongrep kiba dei ki Khasi ki la bitar jur halor kane ka jingwan leh donbor jong ki Nepali, hynrei la lap ba wan poi noh da u Incharge jong ka Langpih BOP ha kaba la ïoh ban ïakren ïatai halor kane ka jingjia.
La ïathuh ruh ba na ka liang u Incharge u la shimkhia bha halor kane ka jinglong jingman ban peit bha ba ki lad jingïada ki dei kiba biang na ka bynta ki nongrep kiba don ha katei ka jaka.
U Bah Robert Wahlang u la ong ruh ba ka long kaba sngewsih ba watla bunsien na ka liang jong u Incharge u ju pyntip sha ki bor ba kham halor halor ki jingjia kiba ju jia ha katei ka jaka khappud. Pynban, ki bor ba kham halor kim shim la shimkhia ei ei.
U Bah Robert u la pynpaw ka jingpynrem jur ïa ka sorkar MDA kumjuh ruh ïa u MLA ka Rambrai, u ba la kheiñ sting palat ïa ka jingshah ñion beiñ jong ki paidbah nongshong shnong kiba dei ki trai muluk ha ki jaka khappud.