Haba la don la ka jong ka niam ka rukom, ka riti dustur, ka kolshor:VP Seng Khasi

Shillong, Ïaïong 13: U Vice President ka Seng Khasi Sengkmie Mawkhar u Rgh. P D Nongrum u la ong ba haba phai sha ki bynta jong ka jingkylla niam, ka riti synshar jong ka ri India ka ai ïa ka hok ba laitluid ban phla ïa kano kano ka jingngeit hynrei halor ki kam jong ka jingkylla niam ne jingngeit ym da kwah than ban pynleit jingmut ïa kane ha ka bynta jong ka jingim, hynrei kaei kaba kham sngewkhia bha ka dei ban phah ïa ka khubor sha ki khun ki hajar, ki samla ba la don la ka jong ka kolshor, ka custom, ka riti dustur, la ka jong ka niam kaba ngeit ha uwei u blei bad la ki jong ki jinglehniam leh rukom, balei hap ban ting ïa kaei kaei, kaba long mynder, hynrei dei ban burom ïa ka jong kiwei bad ieid pat ïa la ka jong.
“Naduh ba ngi dang long khyllung ha kpoh jong ka kmie, haduh ba ngi la samla, ngi rangbah bad haduh ba ngi khlad ka niam Khasi ka don ki jinglehniam bapher bapher, la ka dei ka ïathoh shongkurim, ka jer kyrteng bad ka lehniam haba ngi la leit phai noh sha la u jong u nongbuh nongthaw, te balei ngi kwah ban ting ïa kiwei kiba wan nabar ri,” ong u Bah Nongrum.
U la ong ba katba nangmih ki sngi, ki phew snem ki paidbah ki la nang stad nangshem phang ki la sdang ban kylli kaei kane kaei katai, kaei kaba la kular, kaei kaba mut ban ai, hato kadei kaba thok ne bakla ne kaba shisha, ki sdang ban ïanujor bad kam long shuh kaba suk ba kin shu pdiang lut ïa kaei kaba la ong ba kadei tang kata kaba shisha naba ka don tang kawei ka jingshisha bad ki bynta jong ka pat ki bun.
Haba ïadei pat bad ka jingkylli halor ka jinglong ritpaid u Bah Nongrum u la ong ba ka kyntien rit paid kadei ka kyntien ba ju ïakren bha. “Haba phai sha kiwei pat ki jingngeit nalor ka niam tynrai trai ri ha India kin shah pyrkhat ba ki rit paid hynrei haba phi pyrkhat pat ha Meghalaya ha kaba ki la don bun ki jingkylla niam lehse ngi lah ban ong ba ka niam Khasi tynrai ka don ha ka jinglong rit paid, hynrei ngim da kwah ban pynleit jingmut palat halor kane, ngi trei shitom ban pynneh tyngkai ïa la ka jong ka deiriti, ka kolshor ki jingkordor ban ïada ïa la ka jong ka tynrai bad jingithuh lyngba ka custom bad ka jingngeit,” bynrap u Bah Nongrum.
U Bah Nongrum u la pynpaw ruh ba kumba ka long mynta ka kyntien ba la dang duna kiba ïashim bynta ha ka Shad Suk Mynsiem kam long kaba dei, namar manla u snem ki nongïashim bynta ki la nangkiew nangkiew bad kumba ïohi wat ka jaka shad ha Weiking Jaïaw ka la khapngiah.
“Ngi dang pyrkhat ban pynïar pynheh shuh shuh ïa kane ka jaka shad da kaba wad ki lad jingïarap na ki shnat treikam bapher bapher bad kumjuh ruh na ka sorkar jylla kaba ju ïai kyrshan manla ka por ïa kane ka jingthmu ka Seng Khasi Sengkmie Mawkhar ban pynneh ïa ki riti dustur ba la buh da u longshwa manshwa,” ong u Bah Nongrum da kaba pynpaw ka jingkmen ban ïohi ïa ka jingnang bun ki samla bad ki hep kiba rit ban shim bynta ban pynneh ïa kane ka riti dustur kaba kyrpang bad kaba kyntang jong u Khasi.