Hadien ba pyntbit ha ka Sting Orchestra na Viena pynshoh biej u Cheran Momin ïa ki paidbah ha Nagaland

Shillong Iaiong 13 : U Nongtem na ka jaidbynriew Garo uba la wan hikai pyntbit na Vienna u Ambasal Cheran Momin ula pynshohbiej ia ki paidbah ha ka Nagaland String Orchestra kaba la long ha ka 10 tarik u Iaiong, kaba la long ruh ka khyllipmat kaba rah ïa ka burom jong ka Meghalaya ha ka jingdon bynta ha ka tem ka put kaba ïadei bad ka Classical Music ha ka thaiñ.
ïa kane ka Concert, kaba la ai kyrteng “You’ll Never Walk Alone,” la pynlong ha Bundrock Auditorium, Patkai Christian College ha Chümoukedima bad hadien kane la pynlong ha G. Rio Auditorium ha Kohima, kaba la khring ïa ki nongpeitkai bad ïa ki riewieid ïa ka tem ka put kaba la pyni shai kdar ïa ka jingnang roi ka jingdon jingsngew tynnad ki paidbah ïa ka Orchestra bad Choral Music ha ka thaiñ shatei lam mihngi jong ka ri.
U Cheran uba long u nonghikai ha ka tem ka put, uba tem ïa ka Violin bad Double Bassist, ula pyni ïa ka sap ka phong ka jongu kaba dei shi bynta jongka Orchestra’s Double Bass Section, kaba pyni ïa ka jingnang kiew ka jingdon ki nongtem kiba la ïoh jinghikai pyntbit na ka thaiñ.
Hadien ka jingïoh jinghikai pyntbit na Vienna ïa kaba la tip da baroh kum ka rynsan ha pyrthei ha ka Western Classical Music, u Momin ula pyninam ïa ka rukom tem Orchestra kiba bun jait bad ha ki kyrdan ki bapher kiba la pynwandur katkum ka riti dustur ki briew jong ka dewbah Europe.
“Kane ka rukom ïatreilang ka long kaba kongsan bha ban tei ïa ka jinglong jingman kaba pura ha ka sawdong sawkun jong ka tem ka put ha ka thaiñ shatei lammihngi” la ong u Momin haba ïakren bad u nongthoh khubor u la banjur ïa ka jingdonkam ban long kiba ryntih bad ka jingai jinghikai ka ban ïai neh ha ka Orchestra.
ïa kane ka concert, la pynlong da ka Nagaland String Orchestra bad ki nongrwai jongka MSSM, kaba la khring ïa palat 800 ngut ki nongpeitkai ha Dimapur bad kumba 400 ngut ha Kohima.
Haba phai sha Meghalaya, u Momin u dang trei ban tei ïa kane ka jinglong jingman. Kum u Artistic Director of Venia Academy of Performing Arts and Music, ula ai jinghikai ïa ki nongtem kiba dang samla bad kyntiew ïa ki jingtem da ki ksai ne ‘String’ kum ka jingïoh jinghikai bad ka kabu ban shim kum ka jingkamai jakpoh.
Ula don ruh ïa ka thong ban kyntiew ïa ka Orchestra bad ban thaw ïa ka rynsan ka ban pynïasoh ïa ki nongtem nongput ka thaiñ shatei lam mihngi ka ri bad ki kabu kiba don shabar jongka.