Pyllait ka MFA ïa ka prokram ïalehkai jong ka MSL 5
Ka sienjam kaba 5 kadei ka samoi kaba heh tam haduh 104 tylli ki jingïalehkai.
Shillong, ïaïong 12: Ka Meghalaya Football Association ka la pyllait paidbah ïa ka prokram ïalehkai group stage jong ka lympung ‘5th Meghalaya State League (MSL 5)’, kaba dei ka lympung phutbol ba hakhlieh duh ha ka jylla baroh kawei, ka ban sdang naduh ka 15 tarik mynta u ïaïong.
Mynta u snem kane ka lympung kaba don 33 tylli ki klob ne ki kynhun kiba ïashim bynta ba la phiah ha ki 8 tylli ki Group, kan don haduh 104 tylli ki jingïalehkai group stage, kaba pynlong ïa ka sienjam kaba 5 jong ka MSL kaba heh tam ha ka histori jong kane ka lympung.
Ka Mawlai Sports Club ka dei ka kynhun ban ïada ïa ka burom lahduh (defending champion) bad ka la shah pynïakap ha ka Group C ha kaba ki jingïalehkai kin long ha Amlarem. Hynrei ka jingïakhun plie pyrda kan long hapdeng ka Nongkseh SSCC pyrshah ïa ka Khimusniang SC ha madan First Ground – SSA Stadium ha Polo, ha ka sngi Balang naduh ka por 5 baje janmiet. Baroh kiwei pat ki jingïalehkai group stage kin sdang ha ka por 3 baje nohphai sngi.
Kawei pa kawei ka kynhun kan ïoh ban ïakhun arsien (2 leg) ïa kawei pat ka kynhun ha ka group ba ki don, ha kaba ki ar tylli kiba pyndep ha khmat eh (Top 2) kin jam sha ka wat ïakhun Pre-Quarterfinal, ka ban long ha u bnai Jymmang.
Ha ka jingpyrshang bad jingthmu jong ka MSL ban phriang ïa kane ka jingïalehkai kaba itynnad ha kylleng ka jylla, ka samoi kaba san mynta u snem kan don ar tylli ki jaka thymmai, ha kaba ka Williamnagar bad ka Amlarem ki la ïoh ïa la ka jong ka bynta ban pynlong ïa ki jingïalehkai. Nalor kata, ka Mairang kan wanphai biang kum ka jaka ïalehkai hadien ba ka la pynlong khatduh ïa ki jingïalehkai MSL ha ka sienjam kaba nyngkong.
ïa ka MSL la pynlong da ka MFA bad la kyrshan pura ïa ka da ka Directorate of Sports and Youth Affairs, ka sorkar Meghalaya, naduh ba la sdang ïa kane ka lympung ha u snem 2017. Kane ka lympung ka wanrah lang ïa ki kynhun ba kynsai tam na baroh ki synjuk phutbol Distrik ba la ïasoh bad ka MFA ha kawei ka lympung kaba jur bha ban ïoh long lahduh jong ka jylla Meghalaya.
Mynta ka kynti, ka MSL kan long kaba kham kyrpang namar jia ryngkhat ba la pynlong ïa ka, ha ka khep ba kum ka synjuk ka MFA ka rakhe ruh ïa ka Jubili Ksiar.
Ha ki saw samoi ïalehkai kiba la dep, ka MSL ka la kyntiew shibun ïa ka kyrdan ïalehkai ha baroh ki dong jong ka Meghalaya, da ka nam bad ka burom, khlem da kren ïa ka khusnam, baroh ki ai mynsiem ïa ki nongïalehkai bad ki klob ban ïakhun tyngeh ban long kiba kynsai tam, ban long ki Lahduh jong ka Meghalaya. Mynta ka kynti ruh, la khmihlynti ym duna ïa kaba bha tam na ki kynhun ki ban ïakhun ha ka MSL 5 kaba la pynïar ïa ki kynhun ba ïashim bynta.
Kaba kham sngewtynnad ban tip hangne ka long ba ha ki saw samoi ïalehkai kiba la dep, ki kynhun ne klob ba rah ïa ki nam lahduh ki long ba ïapher, ha kaba la rah nyngkong ïa ka da ka Niaw Wasa United (2017-18), bud sa ka Shillong Lajong (2019), Rangdajied United (2023) bad ka Mawlai (2024-25).
Na ka bynta ka prokram ïalehkai ba pura jong ka MSL 5 phi lah ban shem lyngba kane ka link: https://www.facebook.com/share/p/17NQeFrkE1/
Ka jingpynïakap kynhun na ka bynta ka Meghalaya State League 5.
Group A (Shillong, SSA Stadium) – Nongkseh SSCC (Shillong Sports Association), Mawshun SCC (Riwar Mihngi Football Association), Khimusniang SC (West Jaintia District SA), Umkaber SCC (Tyrsad Area SA)
Group B (Shillong, MFA Turf) – Nangkiew Irat SC (Shillong SA), Mulang SC Nongbah (West Jaintia DSA), Mawlum Tyrsad SCC (Tyrsad Area SA), Mawphu SC (Sohra SA)
Group C (Amlarem) – Mawlai SC (Shillong SA), Amlarem SC, Lamin XI SCC (both Amlarem Sub-Division SA), Laskein SCCC (Laskein Block SA)
Group D (Khliehriat) – Ladthadlaboh SC (West Jaintia DSA), Rymbai Shkenshynriah SC, Thangskai Tiger SC (both East Jaintia DFA), Jalaphet Moochut Pyrdung SC (Saipung Block SA)
Group E (Wahiajer) – Shillong Lajong (Shillong SA), Lumphyrnai Lumsohphoh FC (Thadlaskein SA), Iatyllilang Lumsehkot SCC (Laskein Block SA), Lamyrsiang SCC (Saipung Block SA)
Group F (Mairang) – Langsning FC (Shillong SA), Mishon SCC (Pyndengumiong DSA), Umlakro FC (Western Ri-Bhoi DSA), Lawbah SC (Eastern Border SA)
Group G (Williamnagar) – A’chik SCO Rongjeng (East Garo Hills DSA), Attong Matgrik FC (South Garo Hills DSA), Maram FC (Tura DFA), Balmanduri FC (North Garo Hills DSA), Janepih Youth SCA (Mawshynrut SA)
Group H (Mawkyrwat) – Rangdajied United FC (Shillong SA), Mawten SC (Mawkyrwat DSA), Mawlarshong SC (Nongstoin DSA) and Umdang SC (Mawshynrut SA)