Aiti ka NHIDCL sha ka bor District Ri-Bhoi ïa ka kali kit nongpang
Ban kyrshan ïa ka jingshakri ha ka koit ka khiah
Nongpoh, Ïaiong 10: Kum shi bynta ban kyrshan ïa ka kam sumar paidbah ha Ri-Bhoi, ka National Highways & Infrastructure Development Corporation Limited (NHIDCL) mynta ka sngi ka la aiti ïa kawei ka Ambulance sha ka bor synshar district lyngba ka skhim Corporate Social Responsibility (CSR), hadien ka jingkyrpad na ka bynta ka district.
Ïa kane ka Ambulance la pynlait paidbah ha phyllaw jong ka ophis u Deputy Commissioner ha Nongpoh da u u Abhilash Baranwal, Deputy Commissioner ka Ri-Bhoi, ha ryngkat ka jingdonlang u Additional Deputy Commissioner u Bah Jonathan Shylla, ka District Medical & Health Officer ka Dr. A.R. Marak, u Kunal Barua General Manager (P) ka NHIDCL bad kiwei kiwei ki ophisar.
Haba kren sha ki lad pathai khubor, u DC u la ong ba kane ka jingïarap ka wan hadien ka jingkyrpad jong ka bor district sha ka NHIDCL, kaba dang ïai bteng ban trei ïa ki projek pynroi ha jylla Meghalaya. U la bynrap ba kum ka Aspirational District, Ri-Bhoi ka donkam ïa kum kine ki jingïarap ban pynkhlaiñ ïa ka rukom ai jingsumar paidbah.
La ong ruh ba ïa kane ka Ambulance yn aiti sha ka tnad ka koit ka khiah, ban pynïaid bad pyndonkam paidbah, bad la thmu ban buh ïa ka ha State Dispensary kaba don ha Umiam khnang ba ki paidbah kin ïoh jingïarap ha ka por ba donkam.