Mih ka jingkynnoh ba shah pynwit ka Association Trok jong ka South West Khasi Hills ha ka MCTO&DA

Mawkyrwat, Ïaïong 05: Ka South West Khasi Hills Truck Owners & Driver Association (SWKHTO&DS) ka l akynnoh ba ka jingpynwit bad ka jingleh donbor jong ki dkhot ka Meghalaya Commercial Truck Owners &Driver Association (MCTO&DA) pyrshah ïa ki trok kit coke jong ka South West Khasi Hills Truck Owners & Driver Association ka dang ïai bteng haduh kine ki sngi.
U Bah Skingford Nongbri, President ka South West Khasi Hills Truck Owners & Driver Association, haba kren halor kane ka bynta, u la pynpaw ïa ka jingsngewkhia kaba jur halor ka jinglong jingman ha ka kam kit coke. U la ong ba ka jingbym ïasngewthuh jingmut hapdeng kine ki ar kynhun ka ju lam sha ka jingïakajia bad jingïakhih man ka por.
Shuh shuh, u Bah Nongbri u la kdew ba na ka liang ka Association jong ka South West Khasi Hills kam ju don bynta ban pynwit ne ban pynthut ïa ki trok bad ki nongniah trok jong ka MCTODA, hynrei, katkum ka jingïathuh jong u, ka jingïapynwit ka ju wan beit na ka liang jong ki dkhot ka MCTODA.
Ha kajuh ka por, katto katne ki nongniah trok jong ka South West Khasi Hills Truck Owners & Driver Association, kiba khlem kwah ban pynpaw kyrteng, ki la ïathuh ba ki ju shah pynwit bad shah byrngem byrsit man ka por kaba la buh ïa ki ha ka jingrit mynsiem.
Ha kane ka sngi ruh, la pynlong ïa ka jingïalang kyrkieh jong ki dkhot ka South West Khasi Hills Truck Owners & Driver Association, ha kaba ki la kyntait ïa ka jingai jingmut jong ka MCTODA ban pyntreikam da ka serial number system. Hynrei, ki la shim ïa ka rai ba ka jingkit coke kan long ha ka rukom 50 percent khnang ban pynthikna ïa ka jingïabiang bad jingïasnoh kti, khamtam eh na ka bynta ki trai jaka jong ka distrik.