Nongstoiñ, Ïaiong 05: Ka 1st Futsal League Tournament Nongstoiñ Football fans Clubs, ha ka sngi saitjaiñ ka la poi sha kaba kut jong ka ha ‘Kwis Futsal’ kaba ha Upper New Nongstoiñ, ha kaba ka Al-Nassr FC ka la ïakhun pyrshah ïa ka Nongstoiñ Chelsea Fans.
Shuwa ka final la pyn-long ïa ka programme la pyn-ïaid da u Bah Govin Ïaw-phniaw, ha ryngkat ka jing-donlang da u kongsan Bah G.J.L.Sangriang u ba la ïoh ban ïa pajut kti ïa ki player.
Hapdeng ka jingïalehkai kaba itynnad bha, ka Al-Nassr FC ka la jop ïa ka final da 3 kol la kawei bad rah ïa ka nam lahduh jong kane ka lympung ba mynta u snem.
Haba kren ha ka jing-ïalang u kongsan Bah G.J.L. Sangriang u la ai jingïaroh ïa ka Nongstoiñ Football fans Clubs kaba la lah ban pynlong ïa kane ka lympung ïa ki riew ieid ïa ki Club ba paw ha ka pyrthei.
U la kren ruh shaphang uwei u player ba paw jong ka pyrthei u ba wan na ka long-ïing kaba duk na ka ri kaba duk, ïa kaba une u player la tip kum u Sadio Mane, u ba baroh ki ong balei um im ka jingim kaba shong ha ki ïing paki dulan lane ka jingim kaba suk ne kum kita kiba riewspah.
Hynrei, une u player pat kaei kaba u kamai u seng ki skul ban ai jingnang jingstad kumjuh ban ïarap ïa kiba duk. Kata ka dei ka jingim kaba ma ngi ruh ngi dei ban bud ïa kane ka nuksa jong une u player, ong u kongsan.
La ïoh ban sam ïa ki khusnam sha ka kynhun ba jop bad ba wan ba ar, nangta ka khusnam Top scorer ha u Kyrshan Tariang na ka Nongstoiñ Chelsea Fans u ba lah thep 14 goal, Best Goalkeeper sha u Donkupar Lyngdoh na ka Nongstoiñ Gunners Arsenal fans, Emerging player ka leit sha u Banteinam Ïawphniaw na ka Nongstoiñ Hala Madrid, katba ïa ka Best player of the Tournament ka leit sha u Hopefullnes Wanniang na ka Al-Nassr FC, Best Discipline Team ka leit sha ka Nongstoiñ Gunners Arsenal fans.
ïa kane ka Tournament la seng ki riew ieid ïa ki Club ba paw na ka thaiñ Nongstoiñ West Khasi Hills District, ban pynshlur ïa ïa ki Club ban mih madan ym tang ban ïalehkai hynrei ban lait na ki kam sniew kiba la kynrei bad ka Theme jong kane ka Tournament ka dei ruh kaba ong, ‘Say no to Drug’.
