Shillong, Nailar 26: Ka Mawlai ka la shah pynkyndit watla ha kaba khatduh ka la jop da 2-1 pyrshah ïa ka Mylliem ha ka jingïalehkai jong ka lympung Shillong Premier League 2026 hynne ka sngi Balang ha SSA Stadium.
U Istarbor Marngar (33’) u la pynkhihwin ïa ka jingïalehkai da kaba pynkhihjar nyngkong na ka bynta ka Mylliem hynrei u Basuklang Bina (41’) u la pynïakhaid noh shuwa ban jam sha ka por shongthait bad ka Mawlai ka la pynskhem ïa ka jingjop ha ka khyllipmat ba khatduh lyngba ka kol jong u Lovingstar Suting (90’+4).
Kane kadei ka sien kaba lai naki saw tylli ki jingïalehkai ba dang shen ba ka kynhun kan wanphai wat hadien ba shah lamkhmat ban khur ïa ka jingjop.
Ka Mylliem ka la mad ïa ka jingsdang kaba sniew bha ha kane ka samoi da kaba shah rem ar sien, katba ka Mawlai ka la bat ïa ka kyrdan ba nyngkong ha kaba kut jong ki ar tylli ki Round ba nyngkong da kaba jop shisien bad ïakhaid kawei bad ka la bteng ban bat ïa ka kyrdan ba ha khlieh duh da kane ka jingjop.
Haba phai sha ka jingïakhun, u Istarbor u bym pat la ïoh mih madan ha kane ka samoi hynrei u la ïoh ban sdang na ka bynta kane ka jingïalehkai, u la thep ïa ka kol kaba itynnad ban buh hakhmat ïa ka Mylliem ha ka minit kaba 33. Kane kadei ruh ka kol kaba nyngkong ba ka Mawlai kan shah thep mynta ka samoi.
Nangta, katba u slap u la sdang ban hap, u Arkini Laloo u la lah ban pyllait lyngba katto katne ngut ki nongïalehkai ka Mylliem bad ka bol pashat ka la poi sha u Basuklang, uba la pyrshang khlem jingbakla sha kol.
Nangta ha ka kylla miet, katba ka por ka la nangjan ban ham sha kaba kut kane jingïalehkai ka la paw kumba kan kut ha ka jingïakhaid, hynrei u Lovingstar, uba la mih bujli ha ka kylla miet, u la thep sa kawei pat ka kol kaba kongsan ban pynthikna ïa ka namjop na ka bynta ka Mawlai, kaba la pynlong ïa ki ban wanphai biang sha ka kyrdan ba ha khlieh duh jong ka SPL 2026.
Mynta ka sngi kan don ka jingïakhun kaba itynnad bha hapdeng ka Shillong Lajong pyrshah ïa ka Nongkseh. Kane ka jingïakhun hapdeng kine ki arliang mamla ka la kylla long kawei na ki jingïalehkai kaba ki paid nongkyrshan phutbol jong ka thaiñ ki thrang ban sakhi ha kine ki bnai ba ladep. Kane ka jingïalehkai kan long ha ka por 5:30 baje janmiet.
Kine ki arliang ki la ïakynduh ar sien ha ka SSA Champions Cup ha u snem ba ladep; ki la ïakhaid shi sien ha ka Round ba nyngkong bad ka Nongkseh ka la jop ha ka final. Ki la ïakynduh ruh ar sien ha ka 5th Meghalaya State League dang shen mynta u snem, sa shi sien, ki la ïakhaid shi sien bad ka Nongkseh ka la jop ha ka jingïakhun Super 8 league stage. Ka jingïakhun kaba dang shen hapdeng kine ki arliang mamla ka la jia ha ka Durand Cup, ha kaba ka Lajong ka la mad ïa ka jingjop. Hynrei ka Lajong ka don ïa ka kynhun kaba kham kyrpang na ka bynta ka Durand Cup bad ki rangïalehkai trai ri na ka bynta ka SPL.
