SHILLONG, Nailar 26: Haduh 245 ngut ki nongïalehkai (shynrang bad kynthei) na kylleng ka jylla Meghalaya ki la ïashim bynta ha ka sienjam kaba 41 jong ka lympung Meghalaya State Badminton Championship 2026, kaba la plie pyrda hynne ka sngi Balang, ka 26 tarik Nailar ha Indoor Stadium ha Nongstoin. Kane ka lympung ka ban ïaid saw sngi lynter kan kut ha ka 29 tarik Nailar.
Mynta u snem, ïa kane ka lympung la pynlong da ka West Khasi Hills District Badminton Association (WKHDBA) ha ka jingïatreilang bad ka tnad Sports jong ka sorkar jylla, bad ka Meghalaya Badminton Association (MBA).
Katkum ka jingkheiñ, ki don 182 ngut ki shynrang bad 63 ngut ki kynthei kiba ïashim bynta, ha kaba ka jingpynrung kyrteng (entries) ka la kynjoh sha ka 396 tylli ha kylleng ki 22 tylli ki kyrdan ïakhun. Baroh kin haduh 363 tylli ki jingïakhun haduh kaba kut jong ka lympung.
Ki nongïalehkai jong ki District kumjuh ruh naki Badminton Associations bapher bapher ki la ïashim bynta ha kane ka lympung kaba saw sngi lynter. Kine ki kynthup ïa ka East Garo Hills (12 ngut), East Khasi Hills (46 ngut), Eastern West Khasi Hills (16 ngut), North Garo Hills (11 ngut), RBBA (19 ngut), South West Garo Hills (5 ngut), South West Khasi Hills (35 ngut), West Garo Hills (21 ngut), West Jaintia Hills (31 ngut), West Khasi Hills (36 ngut), bad ka YTBC (13 ngut).
ïa kane ka lympung la wan plie pyrda da ka Hema Nayak, Deputy Commissioner jong ka West Khasi Hills, kum ka kongsan ha ka jingïadon lang u B. Syiem, District Sports Officer; T. Diengngan, nangta u President jong ka West Khasi District Badminton Association; Dr. Lumbor Mawsor, Senior Vice President; S. Masar, Vice President; B. Marwein, General Secretary lem bad kiwei kiwei.
Kane ka lympung ka shakri kum ka rynsan kaba kongsan ban kyntiew ïa ka jingïalehkai badminton bad ban ai ka lad ïa ki nongïalehkai na kylleng ka Meghalaya ban pyni ïa ka sap bad ka mynsiem ïakhun jong ki katba ki dang pynkhreh ïalade na ka bynta ka National Games, ka ban long ha Meghalaya.
