2nd Division ka TSA: Jop ka Tympang Club Iongshiwiat bad Modop SC; Ïakhaid kawei ka jingïakhun

Jowai, Nailar 26: Ka Tympang Club Iongshiwiat bad ka Modop SC ki la jop ïa la ki jong ki jingïalehkai ha ka lympung phutbol (L) Joybell Suiam Memorial Football League 2026 Second Division bala pynïaid da ka Thadlaskieñ Sport Association, kiba la long hynne ka sngi Balang (26 tarik u Nailar, 2026) ha madan Wahiajer Multi Sports Complex Stadium. Hynrei ka jingïalehkai ba nyngkong jong kane ka sngi ka la kut ha ka jingïakhaid.
Ka jingïakhun kaba nyngkong kaba la long hapdeng ka Niriang SC pyrshah ïa ka Unity Phlongingkhaw, ka la poi sha ka jingïakhaid da mar 1-1 kol. Ka Niriang SC ka la ïoh ban lamkhmat ïa ka jingïalehkai lyngba ka kol jong u Chanbok Muruh (34’) hynrei ka Unity Phlongingkhaw ka la pynïakhaid noh lyngba u Philemon Suting (65’).
Haka jingïakhun kaba ar, ka Tympang Club Iongshiwiat kala pynliem noh da 3-0 kol ïa ka Momer SC, ha kaba u Daunibiang Lyngdoh u la pynkhihjar ar sien haka minit ba 25 bad 50, katba kawei pat ka kol la thep da u Chibor Phawa haka minit ba 67.
Nangta ha ka jingïakhun kaba lai ka Modop SC kala jop da tang 1-0 pyrshah ïaka Hunlang FC Lumkynter, bad ïa kane ka namtam na ka bynta ka Modop SC la thep da u Phrangsngi Law haka minit ba 24.
La pyntip ka jingïakhun ha kane ka sngi Palei (27/08/2026) kin long kumne; haka por 10 baje mynstep ka Myngkrem United SC pyrshah ïa ka Thadmusem SC, haka por 12 baje mynsngi ka Madur SC pyrshah ïaka Lad Mukhla, katba haka por 2 baje nohphai sngi ka Mainroad SC Wahiajer pyrshah ïaka Tyllilang SC Moobakhon.