Em ban tih Uranium ha ka jylla : Da ka Resolution la wanrah bad mynjur ka Iingdorbar Thaw Aiñ

Shillong, Nailar 26 : Ka Jylla Meghalaya lyngba ki 60 ngut ki Nongmihkhmat, mynta ka sngi 26 tarik Nailar ka la mynjur ïa ka Resolution hapoh ka Ïingdorbar Thaw Aiñ ba kan ym shah ïa ka Sorkar India lane ïano ïano ban ktah ne khlong ïa u Uranium u ba don ha ka Jylla.
Ïa kane ka rai la wanrah da u Myntri Rangbah ka Jylla, u Conrad K Sangma hapoh ka Ïingdorbar, ha kaba u la ong ba kane ka rai kadei ka khubor kaba khlaiñ sha ka Sorkar India ba ki nongmihkhmat bad ki paidbah ka Jylla ki ïatylli halor kane ka rai, bad da lei lei yn ym shah ban ktah ïa u Uranium hapoh ka Jylla.
U la ong ba ki jaka ha Meghalaya kidei kiba longtrai da ki it ki hima bad hapoh ka jingïada bad jingpeit jong ka District Council kumba la aibor ha ka Khyrnit ba Hynriew ka Riti Synshar.
“Ka Ïing Dorbar Thawaiñ ka Jylla ka la pyni ïa ka dak kaba shai ïa ka jingpyrshah jong ki paidbah ka jylla Meghalaya ban tih Uranium lane ban leh kino kino ki kam ba ïadei bad u Uranium ha ka jylla. Ka Ïing Dorbar ka rai ruh ban kyntu ïa ka sorkar pdeng ba kam dei ban ai jingbit lane shah kino kino ki kam Uranium ha ka jylla kynthup ïa ki jaka ba hap ha ka thaiñ Kylleng Pyndengsohiong Mawthabah Uranium Mining Project, bad ruh ban khang lut ïa ki kam Uranium ha ka jylla,” ong u Myntri Rangbah.
Shuh shuh u ong ba kane ka Resolution kadei ka mat kaba kongsan bha namar kam dei tang na ka bynta ka mynta hynrei wat na ka bynta ka lawei ban sa wan ruh. “Ngi lah ban don ka jingïapher ha ka sainpyrthei hynrei haba dei pat na bynta ban ïada ïa ki briew jongngi, ngi long kawei,” ong u Myntri Rangbah.
U ong ruh ba kane kan phah ïa ka khubor ba ka Meghalaya ka long kaweu ha ka jingïakhun ïa ka kam tih Uranium la ka long ha kano kano ka bynta.
Hashwa ban shim lang ïa kane ka rai la ïashim bynta ruh ban ïatai bad ai jingmut da ki Nongmihkhmat (MLA), naduh u Nongïalam Liang Pyrshah, u Dr Mukul Sangma, u Bah Ardent M Basaïawmoit, u Bah Renikton L Tongkhar, u Bah Paul Lyngdoh, ka Miani D Shira, u Bah Olan Sing Suin, u Bah Brightstarwell Marbaniang, u Rakkam A Sangma, u Bah Adelbert Nongrum, Bah Heaving Stone Kharpran, Bah Charles Marngar, ka Mehtab Chandee A Sangma, Dr Mizanur Rahman Kazi, u AT Mondal, u Bah Pius Marweiñ, u Bah Mayralborn Syiem, u Rupa Marak, u Bah Banteidor Lyngdoh.
Hadien ba la dep ka jingïatai, u Lamphang ka Ïingdorbar Thawaiñ ka Jylla, Thomas A Sangma u la buh ka jingkylli hapoh ka Ïing, bad baroh ki MLA ki la mynjur bad kumta u Lamphang u la pynbna ba ka Ïingdorbar Thaw Aiñ ka Jylla ka la shim ïa kane ka rai ban pyrshah tih ïa u Uranium na ka Jylla.