Jowai, Nailar 27: Ka lympung ïalehkai phutbol jong ka kyrdan Second Division 2026 League Stage bala pynïaid daka East Jaiñtia Hills District Football Association (EJHDFA) ha madan Artificial Ground Diengshynrum, Khliehriat ka la jam mynta sha ka Quarter final hadien ka jingpyndep pura ïa ki jingïalehkai hynne ka sngi Palei (27 tarik u Nailar, 2026).
Haba phai sha ka jingïakhun kaba nyngkong jong kane ka sngi hapdeng ka Ryntihlang SC Brishyrnot bad ka Narwan SCSC kila ïakhaid khlem kol ha kaba baroh arliang kim shym la lah ban pynkhihjar.
Haka jingïakhun kaba ar ka Khliehriat West FC kala jop da 2-1 kol ïaka Ratacherra CSC. ïa ki ar kol na ka Khliehriat West FC la thep da u Zanwame Swer (60’) bad u Owenson Malang (74’), katba ka shikol na ka Ratacherra CSC la thep da u Ngamklet Pohleng (49’).
Nangta ka jingïakhun kaba lai ka SWO Moosianglamare Old SC kala jop suk da 4-1 kol ïa ka Lumshyrmit SC. ïa ki kol na ka Moosianglamare Old SC la thep da u Premio Muksor (18’), u Meshwa Lapasam (65’) bad u Pyniar Pusein (77 & 80’). Ïa ka kol na ka Lumshyrmit SC la thep da u Firstborn Tariang (50’).
La pyntip ki kynhun (team) kiba la ïoh ban rung sha ka Quarter Final ha kane ka 2nd Division 2026 ki long: na ka Pool A – Moolamanoh SC, Pool B – Dkhiah west SCSO, Pool C – Suchen Lumiarain SC, Pool D – Lama Youth SC, Pool E – Narwan SCSC, Pool F – Khliehriat West FC, Pool G – SWO Moosianglamare Old SC bad Pool H – Tuberkmaishnong SCSC.
