Wat u Maieid Hoping ruh un kmenlang halor kane ka Resolution pyrshah Uranium: Bah Methodius

Shillong, Nailar 26 : U MLA ka HSPDP na Mawshynrut ba dei ruh u Myntri Sorkar ka Jylla ha ka sngi Balang u la ong ba ka rai jong ka Iing Dorbar Thawain ka Jylla da kawei ka sur ban pyrshah ïa ka kam tih Uranium ka la pynkmen lut ïa baroh ki nongshong shnong ka jylla bad khamtam eh ïa u Nongseng jong ka HSPDP (Bam Kwai ha Dwar u Blei) Maieid Hopingstone Lyngdoh.
Haba kren bad ki lad pathai khubor hadien ba ka Iing Dorbar ka la dep ban mynjur ïa ka Resolution ban ieng pyrshah ïa kino kino ki kam tih Uranium ha ka jylla na ka liang u Bah Methodius u la ong, “Kum uwei na ki MLA jong ka HSPDP ngi ieng skhem ha ka ishu jong ka Party namar kane ka rai ka dei shi bynta jong ka jingangnud jong ka party naduh ba sdang eh.”
Shuh shuh u la ong ba lada kren shaphang u Nongïalam bad u nongseng jong ka party, Maied Hopingstone Lyngdoh (Bam kwai ha Dwar u Blei, u la dei u radbah ba la trei shitom bad pynpaw ïa ka jingpyrshah jong u naduh kaba sdang bad lehse haduh ba un da khlad noh na kane ka sla pyrthei ruh.
“I ju ïai kren bad ju ïai pynpaw ba ym dei ban ailad ïa kino kino ki bor ban wan tih ïa une u Uranium. Nga ngeit skhem ba kane ka Resolution ba ngi mynjur ha Iing Dorbar mynta ka sngi kan pynkmen ïa baroh ki nongtrei ka party bad khamtam eh ïa I Maieid Hoping watla im don shuh ha sla pyrthei hynrei kane ka rai nga sngew ba kan pynkmen lang ïa I,” u la ong.
Shwa kane, u Bah Methodius u la ïathuh ba ki sngewkmen haduh katta katta ba ka Jylla ka la shim ïa ka rai ban wanrah bad mynjur ïa ka Resolution da kawei ka sur ban phah ïa ka khubor ba kum ka jylla ka pyrshah ïa kino kino ki bor kiba thmu ban tih ïa u Uranium ha ka thain West Khasi Hills bad South West Khasi Hills.
“Kum ka Sorkar bad ka Iing Dorbar ngim pdiang ïa ki bor kiba thmu ban khlong ïa u Uranium ba don ha ka jylla,” u la bynrap biang.
Shuh shuh u la ong ba kum u nongmihkhmat paidbah u sngew ba kane ka dei ka sngi kaba pynkmen ia baroh ki nongshong shnong ka Meghalaya khamtam eh ïa ki nongshong shnong hapoh South West Khasi Hills bad West Khasi Hills kiba don hapdeng ka jingsyier mysiem teng teng haba don ki khubor kiba pynsyier ban tih ia u Uranium ha katei ka thain.
Nalorkata, u ong ba ha ki por ba mynshwa ki paidbah ki ju artatien ia ka sorkar jylla hynrei ka Resolution kaba la mynjur bad rai lang da kawei ka sur ha kane ka sngi ka la pyntikna bad phah ïa ka khubor sha ka pyrthei ba ka sorkar bad baroh hi ki ieng pyrshah ia kano kano ka jingthmu tih Uranium hapoh ka jylla.