Jowai, Lber 2 : U Symbud Myntri Rangbah ba khmih ïa ka tnad PWD (Roads) u Bah Prestone Tynsong ha ka sngi Nyngkong, ula ai ka jingpynbna ban shna noh ïa ka surok Amkoi-Shnongpdeng. Ia kane u la pynbna ha ka jingïadon lang ha ka tamasa Rongkusi tangba ula pynpaw pat ba ka jingpyntrei kan sted lada ki trai jaka ki kloi ba kin ai jaka.
Ha madan Amkoi, u Bah Prestone ula ïathuh ïa ka Dorbar Shnong ba ka Sorkar kan sdang ban pynkhreh ïa ka mang tyngka bad kiwei kiwei ki jingdonkam na ka bynta ka surok namar u ïohi ba ka long kongsan bha ban pynïasoh ïa ki ïew sha ki nongrep bad ka kam jngohkai ha Ri-War, kaba shong pat ha ka jingai ki trai jaka ïa ka jingïatreilang.
Ula ong ba ki jingtei ki dei ka jingbahkhlieh lang jong baroh ka ban ai jingmyntoi ym tang ïa kane ka pateng ba mynta hynrei ïa ki pateng ki ban nang wan ruh.
U Myntri ka Tnad Pule Puthi u Ma Lahkmen Rymbui, ula pynsngew biang ïa ka jingkyrpad, haba pynpaw ba ka Sorkar ka kloi ban ai jingmynjur ban tei ïa ki ïingskul ruh hynrei ka jingïoh ïa ka jaka ka dang dei kawei na ki jingdonkam ba kongsan.
Ula kyntu ïa ki trai jaka ba kin ai ka jingïatreilang khnang ba ki jingtei jong ki jaka pule bad kiwei kiwei kiba ai jingshakri paidbah kin ym shu sahkut kai.
Ki Nongshong shnong kila aiti ïa ka dorkhas ba pan ïa ka surok Amkoi-Shnongpdeng, kynthup ïa ka Nongbareh Lyntiar-Amkoi hapoh ka PWD, ka jingshna bha ïa ka madan ïalehkai phutbol bad ka LP school building ba thymmai.
U Bah Prestone ula bthah ïa ki Ophisar ba kin ïapynbeit bad ka PWD halor ka bynta jong ka surok Nongbareh Lyntiar-Amkoi bad kren ruh halor ki jingkyrshan subsidy bad ki jingai jingmyntoi ïa ki samla ha ki kam jngohkai bad ka sengkam sengjam.
