Nongpoh, Lber 01: Ha kawei ka jingjia kaba sngewsih kaba la jia ha surok bah National Highway 6 ha shnong 12 Mer ha Ri-Bhoi, mar shiliang bad ka CTI, kawei ka longkmie ka la duh noh ïa la ka jingim hadien ba ka la shah iuh ha ka kali kaba la pynpar ñiangkriat ïa ki paidbah kiba don ha katei ka jaka.
La ïoh jingtip ba kane ka la jia ha ka por shiteng sngi mynta ka sngi U Blei. Ki paidbah ba don ha katei ka jaka ki suba ba dei ka trok rit kaba la donkti ha kane ka jingjia, hynrei hadien ba dep tynrah bd iuh, katei ka kali ka la phet krad na ka jaka khlem da sangeh.
Katei ka longkmie kaba la khlad la tip kyrteng kum ka Absana Khatun 27 snem na Assam bad ka dei ruh kaba trei ha kawei ka dukan kaba don hajan ka Bhai Bhai Hotel ha 12 Mer, Byrnihat.
Mardor hadien ka jingjia, ki paidbah ki la pyntip sha ki pulit ka Byrnihat Outpost bad naka liang ki pulit ki la poi mar mar ban shimti ïa ka met bad pynkit mar mar sha Nongpoh Civil Hospital bad ban pynlong ïa ka jingtohkit kaba kham bñiah, khnang ban lap ïa ka kali bad ïa u nongñiah uba donkti, bad ban leh ïa kaba donkam katkum ka aiñ.
