Watla uwei u rishot uba khlaiñ u la khyllem hynrei ngin ïai trei ban wanrah jingkylla ha jylla : Ardent

Shillong, Rymphang 21 : Wat la uwei u rishot uba khlaiñ u la khyllem noh hynrei ka party Voice of the People Party (VPP) kan ïai bteng ban trei ban wanrah ka jingkylla ha ka jylla, ong u President ka party u bah Ardent M Basaiawmoit haba kren mynta ka sngi ha ka jingleh burom ba khatduh ïa kaba sah jong u MP ka Shillong Parliamentary Constituency u Dr Ricky AJ Syngkon ha shwa ban leit on tep don burom ha u Lum Jingtep ka Balang Presbyterian Sumer Umbang.
U la ong “ Kum ka Party ngi la ïa pynlong ka jingïalang sngewlem ha kaba baroh ki nongïalam bad ki dkhot ki la pynpaw ka jingduh kaba khraw bad jingsngewsih halor ki kam kiba une u Nongialam ba khraw u la synniang. Ngi la rai lang ba ngin ïai bteng ban ïai trei na ka bynta ban wanrah ka jingkylla hapoh ka jylla bad ym dei ban shu pynkut noh tang kumto”
“Ka jingiap jongu Dr Ricky AJ Syngkon ka long kum ka jingphrang ïa ka jaidbynriew rit paid ba ngim dei ban hun tang namar ba U Blei u phah ïa ki briew ban shakri da ka jingkitkhlieh” ong biang u bah Ardent.
“ U paia ba khlaiñ tam u la khyllem hynrei kum ka party ngin dang ïai trei da ka jingïasngewthuh jingmut bad halor ka nongrim ngin ym kynran dien tad haduh ba ngin wanrah ïa ka jingsynshar kaba khuid” ong biang u bah Ardent.
U la pynkynmaw ruh ba dei u Dr Syngkon uba la ai jingmut ïa u ba ym dei ban iehnoh ïa ka saiñ pyrthei bad dei da ka jingieit ngi la ïatrei bad seng nongrim ïa ka party kaba long kum shi ïing. “ Ngi la ïa pdiang bad buh ïa ka jingshaniah ha ka jingïalam U Blei kum ki briew kiba dang hap ban bteng ka jingïaid lynti” ong biang u Nongialam ka VPP.
U la pynpaw ka jingsngewnguh ïa u Dr Syngkon da kaba u la ong ym dei da ka spah ka phew hynrei da ka jingieit ba u la ïoh na ki paidbah bad kiwei kiba la ïa kynduh bad une u nongïalam. U la ong ka jingkiew jongu Dr Syngkon ka long kum ka kambah bad ïa kane ka nam bad ka burom jongu yn ïai kynmaw junom namar u la ïoh ka jingieit na baroh ki jaidbynriew.