Khur ka Rangdajied ïa ki lai point ba ïoh pynliem ïa ka Nangkiew Irat ha ka SPL

Shillong, Naitung 12 : Ka Rangdajied United FC ka la ïoh ban khur ïa ki lai point hadien ba ka la ïoh ban pynliem noh da 3-1 kol ïa ka Nangkiew Irat ha ka lympung ïakhun kaba 18 jong ka Shillong Premier League kaba long ha madan Third Ground, Polo hynne ka sngi.
Shwa katei ka jingïakhun, ka Nangkiew Irat bad Rangdajied ki la don mar san point bad mar katjuh ka jingïoh thep kol hynrei ka Nangkiew Irat ka la ïoh ban don ha ka kyrdan kaba saw ha ka miej ïa kheiñ point.
Ha ka jingïalehkai kaba itynnad bha ha ka kylla step ym shym la don ba ïoh ban thep kol hynrei dei ha ka kylla miet ba ka Rangdajied ka la ïoh ban pynkhih jar nyngkong lyngba u Donboklang Lyngdoh ha ka minit kaba 52. Hynrei dei tang ha ka minit kaba 72 ka Nangkiew Irat ka la ïoh ban pynïakhaid ïa ka jingïalehkai lyngba ka kol ba la ïoh thep da u Overkindess Lyngdoh Mawnai.
Ka jingïakhun ka la nang itynnad shuh shuh hadien ba u Donboklang u la ïoh ban thep biang sa shi kol na bynta ka Rangdajied kaba pynlong ïa ka kynhun ban ïoh lamkhmat da 2-1 kol.
Watla ka jingïakhun ka la long kaba mar ïa biang bor bha hynrei ka Rangdajied ha ka por bym poi pyrkhat ka la ïoh ban pynkhih jar biang sa shisien ha ka minit kaba khatduh artad, kata ha ka minit kaba 90+1 lyngba u Wanlamsuk Nongkhlaw kaba pynlong ïa ka kynhun ban jop syndon haduh 3-1 kol.
Kumba long mynta, u Donboklang u kylla long u rangïalehkai uba ïoh ban thep bun kol eh da kaba ïoh ban thep haduh saw kol.
Lah ruh ban kdew hangne, ba ka Nangkiew Irat kam pat lah ban pynliem wat tang shisien ruh ïa ka Rangdajied United ha ka lympung Shillong Premier League naduh u snem 2014.
Ka jingïakhun kaban itynnad bha kan dei ha kane ka sngi Palei ha kaba ki kynhun ba khlaiñbor na Mawlai kin ïa pyni bor, kata hapdeng ka Mawlai Sports Club bad ka Ryntih SC. Kumba long mynta hi, ka Mawlai ka don ha jrong duh ka miej ïa kheiñ point da ki 12 point katba ka Ryntih ka don mynta ha ka kyrdan kaba ar da ki 9 point.