Ka Sorkar ka dei ban kitkhlieh halor ka jingbthei ka par dewïong ha Thangsko : KSU-EJHU

Khliehriat Rymphang 12 : Ka Khasi Students’ Union (KSU) East Jaiñtia Hills District Unit khlem kano kano ka jingartatien ka la pynkitkhlieh ïa ka sorkar jylla halor ka jingjia ka jingbthei hapoh ka par tih dewïong beaiñ ha Mynsyngat ha ka khlaw Thangsko, East Jaiñtia Hills kaba la jia ha ka 5 tarik u Rymphang bad kaba la shim ïa ka jingim jong ki phew ngut ki nongtrei bylla tih dewiong bad pynmynsaw jur ia bun ngut kiwei pat.
Ka seng ha u kyrwoh lyngba u President u bah Streamly N Suchen ka la pynpaw biang ba watla ka dei ka jingjia ba sngewsih, hynrei ïa kane ym lah ban khot kum ka jingbakla ne aksiden hynrei ka dei ka jingmih kaba beit beit na ka jingbym lah jong ka sorkar Meghalaya ban pyntreikam ïa la ki jong ki aiñ, ka jingbym lah kaba la ailad ïa ka jingtih dewïong beaiñ bad ka jingbym lah ban tehlakam ïa ka jingwan rung bad kharaoi jong ki nongtrei bylla poiwir bad kaba lam sha ka jinglute ïa ka khajna jong ka jylla.
Katba ki nongkynthoh ki la kynnoh halor ka jingbym leh ei ei, hynrei ka KSU kaba la peitngor bha ha ki jaka kiba hakhmat eh, ka KSU Shella Unit ka la lapdien bad pynher krad noh ïa ki 11 ngut ki nongtrei bylla napoh Assam kiba la wan ban trei bylla khlem da don ïa ki kot ki sla kiba biang katkum ka aiñ. Kane ka dei tang kawei na ki nuska kaba pynshisha ïa ka jingkhynra kaba dang ïai bteng jong ka seng.
Ki la don ki khubor bad ki jingpynpaw ba ka seng ka la leit rung sha katei ka khlaw ba la kdew kaba dei ka jingpynpaw kaba bakla halor ki jingshisha.Kumba la kam da kiwei pat ki nongialam shnong, ki jaka synshar tynrai kum ka Elaka Sutnga ki treikam laitluid, bad bunsien ki kynhun kiba na bar ki la shah khang ban ioh rung khlem jingbit. Ka jingkylli kaba mih ka long balei la khanglad ïa ki sengbhalang hynrei la ai jingbit laitluid ïa ka jingtih dewïong beaiñ ha kine hi ki juh ki jaka.Ka KSU-EJHDU ka pynbahkhlieh pura ïa ka sorkar jylla halor kane ka jingjia ba sngewsih.
Nalor kata ka sorkar ka la kam tip namar ka jingjngai jong katei ka jaka. Kane ka long kum ka jingkren pynjah burom ïa ka jingsngewthuh jong u paidbah.Kumno ba palat 200 ngut ki nongtrei bylla ki ioh ban rung sha katei ka jaka, bad da ki ton u dewïong la sei na kane ka jaka, hynrei na ka liang ki bor district, ka tnad pulit, tnad labour kim lah satia?
Wat na ka liang u Symbud Myntri Rangbah ka Jylla hi u la pynmih ïa ka jingkren kiba long pyrshah, da kaba pdiang ia ka jingtuid laitluid u dewïong na ki jaka ki bym lah ban poi katba u la kyntait pat ïa ki bor pahara ka sorkar pdeng ban pynkhlaiñ ïa ki jingtreikam.
Ki aiñ ki donkam ïa ka jingpynshisha kaba skhem, ïa ka No Objection Certificate na ki Rangbah Shnong bad ki labour license na ka bynta ki nongtrei bylla ki bym dei ki trai muluk khamtam ka MRSSA 2016 bad ka jingpynthikna ïa ki kot ki sla hapoh jong ka Meghalaya Identification, Registration (Safety & Security) of Migrant Workers Amendment Bill, 2024. Jin da la ka sorkar Meghalaya ka la shimkhia ban pyntreikam shisha ïa kine ki sienjam, uwei pa uwei u nongtrei bynrei ha Thangsko un jin da la don ha ka jingbishar bniah jong ki heh sorkar. Ka jingbym don jong kane ka registry ka la ailad ïa ka jingtrei kaba heh bad kaba beaiñ ka bym lah ban iohi tad haduh ba kan da bthei.
Ka KSU ka la dawa ruh ba ka jingthung ïa ka Judicial Inquiry ban pynlong ïa ka jingtohkit halor kane ka jingjia kam dei ban long tang ka buit ban pynslem, Ka dei ban don da ka por ba la buh bad ki jinglap jong ka ki dei ban lam sha ka jingpynngat ha ki kyndon ïa baroh kiba donkti, kata ym tang ïa ki trai par hynrei ïa ki ophisar sorkar bad ki nongkyrshan saiñ pyrthei kiba ai jingiada, bad ka jingpyntreikam mardor ïa ka Meghalaya Migrant Workers Act bad baroh ki aiñ kiba iadei bad kane ryngkat bad ka jingpynrung kyrteng kaba lah ban sakhi da ki paidbah, bad k sorkar ka dei ban pdiang ïa ka jingtyrwa ïa ki bor pahara na ka sorkar pdeng ban pynlong ryngkat lang ïa ki jingkhynra lyngba ka jingiarap jong ki drone sha baroh ki jaka kiba don jingsuba khnang ban pynduh pyndam ïa baroh ki jaka tih dewïong beaiñ.
U Myntri Rangbah ka jylla uba bat ruh ïa ka tnad Mining & Geology ruh u dei ban shim ïa ka jingkitkhlieh ba thikna halor ka jingpulom jong ka sorkar, bad ka jingpyntreikam ïa ka Inner Line Permit ka dei ban long kaba kongsan ha kaba ïa ka rai ne resolution kaba ar ka dei ban mih ha kane ka jingialang dorbar ka ban wan.