Tura, Rymphang 10: Hapoh ka MLA Connect, la pynlong ïa ka prokram jngoh ïa ki jaka hapoh ka sor Tura mynta ka sngi ban pynkhlaiñ ïa ka jingïadei hapdeng ki nongmih khmat ba la jied, ki bor synshar distrik, bad ki nongshong shnong.
Ha kane ka prokram la ïadonlang da u Myntri Rangbah ka Jylla Meghalaya uba dei ruh u Local MLA ka 51-South Tura konstitwensi u Conrad K. Sangma kum u kongsan. Ha kane ka sngi la donlang ruh u Deputy Commissioner ka West Garo Hills u Vibhor Aggarwal bad u Superintendent of Police u Abraham T. Sangma, ha ryngkat kiwei pat ki heh sorkar bad ki nongshong shnong ka thain.
Ha kane ka jingleit jngoh, ki nongshong shnong ki la pynpaw ïa ki mat ba ïadei lang bad ka jinglong jingman jong ki surok, ki jingeh kiba ïadei bad ki samla, bad kiwei kiwei ki mat ba ïadei bad ka thaiñ.La pynlong ïa ki jingïakren ban sngewthuh ïa kine ki jingeh, ïa kiba la kdew da ka bor synshar district bad ki tnad bapher bapher na ka bynta ka jingbuddien bad jingleh ïa kaba donkam.
Ka jingthmu jong ka MLA Connect ka long ban kyntiew ïa ka jingpynpoi sha ki jaka ba shapoh bad ban pynbha ïa ka jingïatreilang hapdeng ki paidbah, ki nongmih khmat ba la jied, bad ki heh sorkar ban pynthikna ïa ka jingsynshar kaba shim khia bad kaba kynthup lang hapoh ki jaka sor.
