Ha Shillong Airport khie u jumai kai ba 8.2 magnitude, pynkhreh ka jylla ban ïada na ka jingshah lyngshop

Nongpoh, Rymphang 09: Kum ka jingpynkhreh naka jingshah lyngshop ka bor mariang khamtam u jumai ka Meghalaya State Disaster Management Authority (MSDMA), ka District Disaster Management Authority, Ri-Bhoi District, ka Revenue & Disaster Management Department haka jingïatreilang bad ka National Disaster Management Authority (NDMA) mynta ka 9 tarik Rymphang kala pynlong ka prokram kyrpang ban hikai sha ki paidbah halor ki lad jingïada ban pynkhreh lada wan kano kano ka jingshah lyngshop mariang khamtam u jumai.
Ïa kane ka prokram jinghikai la pynlong ha Kad Liengsuiñ ha Umroi ha kaba la wan ban shim bynta lang naduh ki heh ophisar ka district ba kynthup ïa u Bah A. Myrthong Assistant Commissioner ka Ri-Bhoi, ki ophisar pulit, ki nongtrei ka tnad ka koit ka khiah, ka Tnad Fire & Emergency Service, Bhoirymbong C&RD Block, Shillong Airport, Umroi lem bad kiwei kiwei ki heh ophisar.
Ha kane ka sngi u jumai ba 8.2 Magnitude ka jingheh u la khie kynsan bad lyngshop ïaka kad liengsuiñ kum ka jinghikai bad ka jingpynkhreh kumno ban leh ha kum katei ka por kaba ki paidbah ki lamwir kaba la wanrah ruh bun ka jingmynsaw bad ruh ka jingduh ki mynsiem briew.
Lyngba ka jinghikai ha kane ka sngi ka jylla Meghalaya lyngba ka tnad Disaster Management kala long kaba la khreh haba wan ka jingshah lyngshop mariang bad ha kane ka juh ka sngi ïa katei ka juh ka prokram la pynlong ruh ha M/S Umiam Distillation Private Limited ha EPIP Byrnihat.