Sha ka Government College pynbna u bah Prestone Tyngsong ïa ka Sngap Syiem College, Mawkyrwat

Mawkyrwat, Rymphang 08,: Ka long kaei kaei kaba sngewtynnad bad ka burom ïa ki Nonghikai jong ka Sngap Syiem College, Mawkyrwat kawei na ki kolej ba don hapoh jong ka South West Khasi Hills District kumjuh ruh ïa u Dr. K.K. Nongsiej uba dei u Principal na ka bynta ka jinglen-lade ban noh synñiang na ka bynta ban pynbiang ïa ka jingdonkam jong ka kolej ha kaba na ka tulop jong ki 50% ki khlem bynnud ban noh synñiang ban shna ïa ka Multipurpose Hall jong ka Sngap Syiem College.
Shuh shuh la ong ba ym tang katta shibun kiwei de kiba la ïoh ban noh ïa u synniang u bynhei kiba na ka liang ka Sngap Syiem College ka la buh ban pynsah nam ïa ki kyrteng jong ki ha u Maw-nongrim jong ka Hall ba la tei ha kane ka kolej bad ba la wan plie pyrda da u bah Prestone Tynsong uba dei u Symbud Myntri Rangbah ka jylla Mehgalaya.
Ym tangkata, kaba pynkmen shuh shuh ïa ki nonghikai, ki nongpynïaid jong kane ka kolej bad ki samla pule ruh ba na ka liang u bah Prestone Tynsong u la pynbna syndon ba na ka People’s College sha ka Government College ïa ka Sngap Syiem College.
Ha kajuh hi ka sngi, u bah Prestone Tynsong ula ïoh ruh ban pyllait ïa ka kot ba la thoh da u Dr. K.K. Nongsiej u Principal jong ka Sngap Syiem College, Mawkyrwat ba la ai kyrteng, “Historical and Socio-Economic Glimpse of South West Khasi Hills District Meghalaya”, da kaba ula pyrto ïa ka jingtrei shitom bad ïa ka jinglah jong ki ba ki la kiew sted ha kaba ïa dei bad ka jingnang jingstad bad da kaba banrap ruh ba ka jingnang jingstad bad ka pule puthi ka dei kaba donkam bad ka dei ka spah bah na ka bynta ka mynta bad ka lawei ka pateng ban wan.
U bah Prestone Tynsong ula ong shuh shuh ba bun kiba ïa kren beiñ ïa ka jingleh bad treikam jong ka Sorkar MDA pynban ai ba kin kren hynrei ki kam jong pat kin kren kham jam ban ïa ka ktien namar kane ka sorkar ha ka jingïalam jong u Conrad K. Sangma ka la lah ban thaw ki lad ki lynti da ki spah klur na ka bynta ki nonghikai SSA bad kiwei de bad da kata ngeit skhem tang hadien lai snem ka Jylla Meghalaya kan sa long kawei ka jylla kaba wan shakhmat na kiwei ki jylla ha Ri India ha ka jingkiew ha ka jingnang jingstad.
Kiwei de kiba la ïadonlang ha kane ka sngi ki long naduh u bah Renikton Lyngdoh Tongkhar uba dei u MLA ka Mawkyrwat Constituency, u bah H.M. Shangpliang, u bah Hamletson Dohling, bad kiwei de ki riew rangbah kiba la shah khot sngewbha.