Nongpoh, K’lyngkot 31: Katba ka Balang Shnong Umthangïong kaba don ha shnong Umklai ka dang pynkhreh ban pynkut ïa ka jingrakhe Jubilee Rupa, ka Balang ka la ioh ïa ka jingkyrkhu lyngba ka jingpdiang ïa kawei ka podium thymmai kaba la shna itynnad bha ha phyllaw jong ka ïingmane.
Ïa kane ka podium la tei lyngba ka skim SRWP, ha ka jingpynmang jong u MLA ka Nongpoh, u Bah Mayralborn Syiem. Ïa ka jingïaplie paidbah ïa kane ka podium la pynlong mynta ka sngi ha ka jingïalang paidbah kaba la sakhi lang da u Rangbah Shnong ka Umklai u Bah Kyrshan Pamshong, ryngkat bad ki nongkitkam bad ki paid riewngeit jong ka Balang Shnong Umthangïong.
Haba ai jingkren ha katei ka jingïalang, u Bah Mayralborn Syiem u la pynpaw ïa ka jingsngewkmen bad jingïaroh ïa ka Balang bad ïa ki nongpyntrei kam kiba la shimkhia ban shna ïa kane ka podium. U la ong ba kane ka kam ka long ka nuksa ba ka jingïarap lyngba ki skim sorkar ka lah ban wanrah ïa ki jingmyntoi shisha sha ki shnong, lada pyndonkam hok ïa ki.
U MLA u la kitbok kitrwiang ruh ïa ki nongïalam niam bad ïa ki paid riewngeit, khamtam ha kane ka por ba ka Balang ka dang ïaid shakhmat ban pynkut ïa ka jingrakhe Jubilee Rupa. U la pynpaw ka jingkyrmen ba ha ka sngi pynkut jong katei ka Jubilee, ha kaba yn sa pynlong ïa ka jingïaseng paidbah kaba heh, kane ka podium thymmai kan long ka jingïarap kaba khraw ïa ka Balang.
