Shillong, K, Lyngkot 31: Ka National People’s Party (NPP) Sohra Block ha ka sngi Thohdieng ka la pynlong ïa ka jingïalang ban pynskhem ïa ki dkhot jong artylli ki shnat treikam jong ka Party ha Mawkdok Community Hall, kaba kynthup ïa ka National People Youth Front (NPYF) bad ka National People Farmers Front (NPFF).
Ha kane ka jingïalang la wan ban ïa shim bynta lang ki paidbah naduh ki samla bad ki nongrep kiba hapoh ka Sohra Block.
Ka jingïalang ban pynskhem ïa ki dkhot ka Youth Front bad Farmers Front, kadei ban pynkhlain ïa ka jingïadei hapdeng ki samla bad ki nongrep ryngkat ka party bad ban don ruh ka jingïatrei lang ba jan bha hapdeng ki samla bad ki nongrep ha ka jingtei ïa ka jylla bad ka ri hi baroh kawei.
Ha kane ka jingïalang la ïoh ka jingïakren bad jingïaroh halor ka bynta ba kongsan jong ki samla bad ki nongrep na ka bynta ban kyntiew ïa ka roi ka par bad kila rai ruh ban ïatreilang na ka bynta ban pynkhlaiñ ïa ka party ha Sohra Block.
Ha kane ka jingïalang ki nongïalam ka NPP kala pynskhem ïa u Bah Skhemdor Phanbuh kum u President ba thymmai jong ka NPYF, katba ïa ka kam General Secretary la pynkhamti ha u Bah Kyntiewbor Nongkhlaw, ryngkat bad 23 ngut ki nongkitkam ba bynta ha ka jingïalam jong ka Front.
Ha kaba ïadei bad ka NPFF jong ka Sohra Block, la ynskhem ïa u Bah Noversing Nongkynrih kum u President bad u Bah Shaiborlang Kharbuli kum u Secretary.
Ha kane ka sngi la don lang ruh u MLA ka Sohra, u Bah Gavin Mylliem, uba dei ruh u President ka National People’s Party, East Khasi Hills District, ryngkat bad ki nongïalam ka party ba kynthup ïa u Bah H.M. Shympliang, President ka NPP Farmers Front, u Bah Egenstar Kurkalang, u General Secretary jong ka NPP Farmers Front, u Bah Khrawbok Sohkhlet, u President jong ka NPYF East Khasi Hills bad Secretary ka NPP East Khasi Hills District, u Bah Alan West, bad u Bah Sharai Warjri, lem bad ki nongkitkam jong ka Sohra Block bad ki nongkitkam jong ka National People Women Front (NPWF) Sohra Block.
