SHILLONG, Kyllalyngkot 29: Saw tylli ki kynhun ba kynthup ïa ka Nongthymmai Nongkynrih SC, ka Sohiong FC, ka PFR bad ka Umphyrnai SC, ki la la lah ban jop ïa la ki jong ki jingïalehkai ha ka lympung phutbol jong ka Shillong Sports Association (SSA) na ka bynta ki khynnah kiba hapoh 12 snem kaba la tip da ka SSA U-12 Football league 2025-26, kiba la long hynne ka sngi Palei (29.01.2026), ha Polo.
Ha ka jingïalehkai ba nyngkong, ki khynnah jong ka Nongthymmai Nongkynrih SC ki la pynjemkhnap da 6-0 kol ïa ka Summit Academy, ha kaba baroh hynriew tylli ki kol la thep da u heprit R. Kharshandi (1, 13, 15, 16, 18 & 24’).
Ha ka jingïalehkai kaba ar, ka Sohiong FC ka la jop da 2-0 kol pyrshah ïa ka Smit SC. ïa kine ki ar kol jong ka Sohiong FC la thep da u B. Thabah (9’) bad u M.Thabah (12’).
Nangta ha ka jingïalehkai kaba lai, ki khynnah ïalehkai jong ka PFR ki la pynliem noh ïa ka Mawlai SC da 3-0 kol. Kiba la pynkhihjar na ka bynta ka PFR ki long u K.Syiemlieh (13’), B.Thawmuit (17’) bad u B.Mawkhroh (39’).
Ka jingïalehkai kaba saw ka la long kaba kham itynnat, ha kaba ka Umphyrnai SC ka la jop da ka said da 3-2 kol pyrshah ïa ka Nongthymmai SC.
Ki ar kol jong ka Nongthymmai SC la thep da u B.Nongkhlaw (10’) bad u G. Warlarpih (39’), katba ki lai jong ka Umphyrnai SC la ïoh ban thep da u R.Kynsan (26 & 34’) bad u L.Mylliem (38’).
