Shillong, Rymphang, 7: Ïa ka jingïathir ïatai halor ka um ne ka International Water Conclave ka la long ha ka sngi Balang ha State Convention Centre Shillong, ha kaba u Myntri ka tnat Water Resources Bah Coming One Ymbon u la long u Kongsan.
Ha kane ka sngi la pylong ruh ïa ki jingïakob dro bad airong, jingïakob shut jabieng bad jingïakob shondur halor ka jingpynneh pynsah ïa ka um.
U Bah Ymbon haba kren ha kane ka jingïalang u la ïathuh ïa ka jingeh halor ka jingkyrduh um ynda la poi u snem 2040 bad kyntu ruh ba donkam ban kynshew ïa ka um bad ban pynkhuid ïa ka um baladep pyndonkam bad ban ïada ïa ki tyllong um. U la kyntu ïa ki pateng ba mynta ba kin shim ïa ka jingsmai ban ïada ïa ka mariang.
U la ong ba ka ngi dei ban ïatakhuh bad ki jingshah tynjuh ha ka jingïada ïa ka um lada ka wan ka jingkyrduh um, ka jingjaboh ka mariang bad ka jingkylla ka suiñbneng. “Dei tang ka jingïatreilang jong ngi, ngin sa lah ban ïada ïa ki tyllong um na ka bynta ka jingmyntoi jong ki pateng ki ban sa wan.
Shuh shuh u la ong ba 90% na ka um slap na Meghalaya ka tuid ei na ka jylla sha Bangladesh lane sha Assam. “Ngi donkam ban ïada bad ban pynneh pynsah na ka bynta ban kynshew ïa ka jingdon jong ka um khamtam ïa ka um slap,” u la ong.
U Additional Chief Secretary ka jylla u Dr Shakil P Ahammed, u la kyntu ïa ki samla ba kin don ïa ka mynsiem ban pynneh ïa ka mariang bad ïa ki um ki wah.
U la ong ba ki kpa tymmen ki la ïada ïa ki um ki wah, ki la ïada ïa ka mariang bad ïa ki khlaw ki btap bad dei namarkata ngi kmen kumba ngi long mynta. “Lada ngim ïada ïa ka pyrthei jong ngi, lada ngim ïada ïa ki khlaw ki btap bad ki um ki wah, ka pateng ka ban sa wan kan sa ïakynduh ïa ka jingeh,” la ong u Ahammed.
“Ngi dei ban sngewthuh ïa ka jingkordor jong ka mei mariang. Lada ngi lum lang ïa ka jingdon jong um kaba don ha baroh kawei ka ri India la kumno kumno shwa u snem 2040, ka jingduna um kan long kumba 63 billion cubic metre ka um hapdeng ka jingsam bad ka jingdawa,” u la ong.
Ha kane ka jingïalang, la sakhi ïa ka jingïashim bynta lang da ki riewshemphang bad ki ophisar kiba la ïathir ïatai halor ka jingkyrduh um, ka jingjaboh bad ka jingkylla ka suinbneng.
