Mawkyrwat, Rymphang, 7: Ka long ka khubor kaba ban ai mynsiem shuh shuh ïa ka National People’s Party (NPP) Mawkyrwat Block Committee ha kaba ha kine ki khyndiat sngi shen u MDC jong ka Congress na Mawkyrwat Constituency u Bah Carnes Sohshang un sa leit noh ban pynïasoh ïalade bad ka National People’s Party (NPP).
Ia kane la pyntip da u State President ka NPYF Bah Kitborlang Nongrem ha ka jingïalang kaba la long Mawkyrwat.
Ban pynkhlaiñ shuh shuh ïa ka jingtreikam jong ka NPP Mawkyrwat Block Committee, ka la don ka jingïathir ïatai kumno ban pynïaid shaphrang ïa ki kam jong ka party bad kumjuh ruh ban ai jingmut kumno ban sa pdiang ïa ki riewthymmai ha kaba la ïoh jingkren ryngkat ki jingbatai na u State Working President Bah Hamletson Dohling, Bah MacMillan Byrsat bad u Bah Himalaya Shangpliang.
U Bah Kitborlang Nongrem haba kren sha ki lad pathai khubor u la ong ba ka long kaei kaei kaba pynkmen ïa ka party NPP hapoh ka South West Khasi Hills District namar ha ka sngi Baar kum ki nongïalam ki la ïa kynduh ïa baroh ar tylli ki Block Committee kawei ha ka Ranikor Block Committee bad kawei ha Mawkyrwat Block Committee ha kaba da ki hajar ngut ki briew ki la ïa wan ban sakhi.
U la pynsngew ba hapoh ka Mawkyrwat Block Committee haduh mynta ym pat lah ban pynthymmai ïa ka komiti ba pura hynrei u Adhoc President u don ban pynïaid ïa ki kam bad lehse shen ki jingkylla hapoh kane ka Mawkyrwat kin sa don bad ka rai jong ki kum ka party ha ka jingïalang ka long ban ap ïa kata ka por namar la sngewthuh ba kin bun bah na kiwei de ki seng saiñpyrthei ki don jingthmu ban wan pynïasnoh sha ka NPP.
“Watla kum u nongïalam u don hapdeng ki jingshah kynthoh na kiba bun ki liang hynrei u don pat ka mynsiem jong ka jingkmen namar ki jingkylla kin sa wan”, ong u Bah Nongrem.
U la pynshai shuh shuh ba tang da ka komiti kaba rim, kum u nongïalam u sngewthuh shai ba ki kam kin nym poi shano shano bad dei ha kata ka nongrim ba kum ki nongïalam ba la don lypa ki don ka jingpyrkhat ba lada don kino kino ki kynhun kiba wan ban pynïasoh kum ki nongïalam barim ki long kiba la kloi ban pdiang sngewbha.
Ha kaba kren halor ka jingthmu ban wan pynïasnoh u Bah Carness Sohshang sha ka NPP, u Bah Nongrem ula kren da kaba shai ba ka la don ka jingïakren ba u Bah Sohshang bad ka kynhun kin sa wan pyniasoh sha ka NPP.
“Namarkata, kum u nongïalam nga don beit ba mynsiem ba lada don kino kino kiba wan pynïasnoh thymmai, nga long uba la kloi bad pdiang kyllud mynsiem,” la bynrap u Bah Nongrem.
