Shillong, Rymphang, 7: Ki doktor AYUSH kiba don hapoh ka shatri jong ka AYUSH Medical Association of Meghalaya (AMAM) ka la pynlong ïa ka jingïakhih lyngba ka Social Media ban pynpaw ïa ka jingpyrshah halor ka jingbym sngap jong ka Sorkar Jylla ïa ki jingeh ba ïakynduh.
Ha u kyrwoh ba la phah da u President ka AMAM, u Dr. A. Lyngdoh u la ong, “ka Association ka la pynlong ïa ki jingïakhih lyngba ka Social Media da kaba buh ïa ki slogan, ki jingthoh na ki kotkhubor bad ïa ki ishu bym pat lah ban weng jong ka AYUSH Department ha ka jylla.”
U Dr. Lyngdoh u la ïathuh ba ka Directorate of Health Services (DHS) ka la khot ïakren ïa ka Association halor ki mat kiba ïadei bad ki doktor AYUSH ha ka jylla bad ka mat kaba kongsan tam ha ka jingïakren ka long halor ka jingpyntreikam ïa ka Service Rule jong ki doktor AYUSH kiba shakri ha ki hospital sorkar.
“Namar ka jingbym kitkhia ïa ka Service Rule haduh mynta ym shym la pynrung ïa ki doktor AYUSH kiba dei shakri Sorkar,” u la ong.
“Kane ka mat ka dei kaba la pyntlot ha kaba ïadei bad ka jingthungkam ïa ki doktor AYUSH ha ka kam sorkar, bad ba ka por ka la donkam ban thung kam bun ki nongtrei na ka bynta ban pynkha ïa ka Directorate of AYUSH (kumba la mih ha ki lad pathai khubor bun bunsien),” la bynrap u Dr. Lyngdoh.
“Ka ophis (DHS) la kular ruh ïa ka Association ba ka tnat kan sa peit halor ka jingpyntreikam ïa ka Service Rule hapoh kane ka taiew bad kular ruh ba ïa kane ka kam yn sa rah ban ïakren bad ki bor bahalor ha ki taiew ban sa wan,” la ïathuh u Dr. Lyngdoh.
Ka Assocation ka la kynthoh ruh ïa ka jingbym patiaw jong ka ophis ka Myntri ka Koit ka Khiah ka Sorkar Jylla halor ka jingeh jong ki doktor AYUSH kiba dei ki nongtrei jong ka tnat ka Koit ka Khiah. “Wat hapdeng ki jingïai kyrpad ban khot ïakynduh, hynrei kam shym la don kano kano ka jingai jubah,” la kynnoh ka Association.
Ka Association ka kyntu ïa ka Myntri ka Koit ka Khiah ka Dr Ampareen Lyngdoh ba kan pyllait por ban khot ïakren ïa ki jingeh ba ki doktor AYUSH ki ïakynduh lane ka Association kam don lad shuh da kumwei pat sa tang ban shu pynlong da ka jingïakhih da kaba mih sha surok.
“Ka Association ka la rai ban ïai bteng ïa ka Social Media Protest bad kyntu ruh ïa baroh ki doktor AYUSH bad ïa ki paidbah ban pyrshah ïa ka jingleh meinah jong ka Sorkar ïa ka rukom sumar AYUSH hapoh ka jylla,” la pynkut u kyrwoh.
