Shillong, Nohprah, 01: Ka Dorbar Shnong Laitkor Mawrie Lumheh hadien ka jingkhynra Trading License bad Labour License hapoh u pud u sam jong ka shnong, ha ka sngi Thohdieng ka la shim ïa ka rai ban ai por hynriew bnai ïa ki bar jylla ba kin pynkynriah noh ïa ki kam khaii pateng sha kiwei pat ki jaka bad ruh ban mih noh napoh u pud u sam jong ka shnong.
Ha ka jingïakren bad u nonglum khubor, u Rangbah Shnong jong ka shnong Laitkor Mawrie Lumheh Bah Pynshailang Mawrie, u la ïathuh ba ïa kane ka rai la shim ha ka dorbar jong ka shnong kaba la long mynta ka sngi.
“Ha ka sngi Thohdieng jong ka taiew baladep ngi ladep khynra Trading License bad Labour License da ka jingïatreilang bad ka KHADC. Ha kato ka sngi, ngi la lap ba ki don shibun bah kiba khaii be-aiñ hapoh u pud u sam jong ka shnong bad ngi lap ruh ba ki don bun ngut ki bar jylla kiba trei ba ktah be-aiñ hapoh u pud u sam jong ngi khlem da ïoh jingbit na ka Dorbar Shnong,” la ong u Bah Mawrie.
“Hapoh ka shnong ka thaw jong ngi, naduh barim bajah ngi don beit ka jingpyrkhing ba ngi la rai ba ngim ju shah ïa ki bar jylla ban wan trei wan ktah hapoh u pud u sam jong ngi. Ngi la shong ïa ka Executiv Committee jong ka shnong ha kaba ngi la ïathir ïatai bha halor kane ka bynta bad da kawei ka sur ngi la shim da kawei ka jingmut ba kam long ban ai ïa ka Trading License ne Labour License ïa kino kino ki bar jylla hapoh ka shnong bad lada ngi leh kumta (ai laisen) ngin ym nang shuh ban jied ïa kano ka kam ngin ai bad ïa kano ka jait kam ngin ym ai,” u la ong.
“Lada ngi la ai mynta ïa ka laisen, ïa kiba wan hadien habud ruh ngin hap ban ai. Suki suki, kin sa nang kharoi ki bar jylla bad ngin ym lah shuh ban tehlakam ïa ki jingleh Benami pat. Lada ngim ai ïa ka Trading License kin bun hi ki bar jylla ki ban wan da ka kyrteng jong ki Khasi bad kin sa ong ba ka kam ka dei ka jong ki Khasi bad kin sa ong ba ki dei tang ki nongbylla. Kan don ka jingleh Benami kaba jur hapoh u pud u sam jong ngi,” la ong shuh shuh u Bah Mawrie.
U la ong ba ka EC ka la shim beit da ka rai ban shu khang lut wat ïa kiba la don mynta ruh. “Ngim sngew eiei ban khang ïa ki namarba kiba don mynta ruh ki dei kiba long be-aiñ lypa kiba khlem pat ïoh ïa ka No Objection Certificate (NoC) na ka Dorbar Shnong,” u la bynrap.
Shuh shuh u la ong, “ban shim kat ïa kane ka rai, namarba ka dei ka kam ïap kam im, kan bha shibun ban shim lang ruh ïa ka sur jong u paidbah. Ngin peit la ki paidbah ki kwah ban don ki bar jylla lane ki pyrshah. Hadien ba la lum ïa ka dorbar mynta ka step ngi shem ba baroh ki paidbah ki kwah ba ngin kyndang beit ïa ki bar jylla bad ki paidbah ki ai ka jingkyrshan ïa ka EC bad ngi la shim da ka rai jong ka Dorbar Shnong.”
“Ngi la aipor ïa ki 6 bnai ba kin pynkynriah noh sha kiwei ki jaka bad ban mih napoh une u pud u sam jong ngi bad ngin apor haduh ka 30 tarik Jymmang, 2024 ba kin mih noh napoh u pud sam,” la ïathuh u Bah Mawrie bad bynrap, “naduh ka 1 tarik, Jylliew, 2024 ngin ym shah shuh ïa ki bar jylla ban leh ïa ka khaii ka pateng hapoh u pud u sam jong ngi.”
“Ïa kiba trei bylla ruh namarba ki don ki Khasi kiba buh nongtrei da ki bar jylla, ïa kine ruh ngi la aipor kylluid hynriew bnai bad ki dei ban bujli ïa ki nongtrei da ki trai jylla. Kane kan treikam salonsar ïa baroh, naduh kiba don ïa ki Showroom kali, ba don Petrol Pump, ki Karkhana bad kiwei kiwei ki jait kam dei ban long beit da ki Khasi,” u la ong.
Ha kaba ïadei bad ki Karkhana bad Workshop bad ki kam kiba donkam ïa ki briew kiba nabar, ka Dorbar Shnong ka la rai ba ki nongaikam ki lah ban khot ïa ki nongtrei nabar jylla tang hapoh 15 sngi ha ka shi snem. Nalor kata, ka Dorbar Shnong ka la pyrkhing ruh ba ki nongaikam kim lah ban wanrah ïa ki nongtrei bar jylla palat ïa uwei ne ar ngut.
Ïa ki nongshong shnong kiba donkam ïa ki Architech nabar jylla ban shna pynwandur ïa ki ing ki sem, ka Dorbar Shnong ka la rai ba yn ai jingbit ïa ki nongbylla bar jylla ban trei tang hapoh shi bnai.
“Na ka bynta ki kam ba dang lah hi ban trei ki Khasi, ka Dorbar Shnong kan ym ai NoC da leilei ruh em ban trei da ki bar jylla,” la ïathuh u Bah Mawrie.
Ka Dorbar Shnong ka la bthah ruh ïa ki nongaikam ba ki dei ban da thoh aplikeshon, ban ai ruh ïa ka EPIC bad ban pynthikna ruh wat ïa ka jaka sah jong ki nongbylla bar jylla. “Lada ngi ïohi ba ka jingpan jingbit ka long kaba biang, ngin sa ai da ka Special Permission na ka bynta katta sngi bad katta taiew. Hynrei ym ban shu ïaid lait ïa ka Dorbar Shnong. Lada lap ïa kiba khot bylla khlem ka jingtip jong ka Dorbar Shnong kin ngat ha ka jingpynshitom kaba tyngeh,” la maham ka Dorbar Shnong.
Halor ka shongkha shongman, u Bah Mawrie u la ïathuh ba ka Dorbar Shnong ka la shim ïa ka rai ba kino kino kiba ïapoi kha bad ki briew ki bym dei ki Khasi, yn ym shah ban shong ban sah hapoh ka shnong.
“Ngim pyrshah ïa ka jingpoikha poiman jong ki, hynrei katkum ka kyndon shnong, kito kiba ïoh kurim da ki bym dei ki Khasi ki hap ban mih noh napoh ka shnong ka thaw,” la ong u Bah Mawrie bad bynrap, “kane kan long ka jingmaham ïa ki khun samla jong ngi ba kin long kiba phikir.”
