Shillong, Nohprah 1 : U Nongpathai khubor jongka BJP uba dei ruh u pulit ophisar IPS ba la shongthait na ka kam u bah M.Kharkrang u la ong mynta ka Sngi Thohdieng ba ka BJP ka shaniah beit ha ka jingstad jongka sorkar halor ka jingkren ïasuk bad ka seng Hynniewtrep National Liberation Council (HNLC).
“ Lada kane ka jingkren ïasuk kan wanrah ka jingshongsuk shongsaiñ hapoh ka jylla kan long kaba bha tam” ong u bah Kharkrang.
Lah ban pynkynmaw ba dang shen u Chairman cum Commander-in- Chief
jongka seng HNLC u bah Bobby Marwein lem bad u General Secretary cum Publicity Secretary u bah Sainkupar Nongtraw ki la pynpaw ba kim lah ban wan ïashim bynta ha ka jingkren ïasuk katba ka sorkar kam pat weng lut ïa baroh ki jingpynngat kyndon ïa baroh ki dkhot ka seng bad kumjuh ruh ban ïasoi ïa ka soskular sangeh ïasiat.
Haba kylli halor kane u bah Kharkrang u la ong “ Ngim tip lut ïa kiei kiba ka sorkar ka thmu namar hangne wat ka ïing Bishar ruh ka ïadon bynta lang, kumta ngim tip kumno ka sorkar kan leh ïa kane na kata ka daw ngi shaniah beit ha ka jingstad jongka sorkar” ong u bah Kharkrang.
Halor ka jingkylli hato ka sorkar kan map lut ïa baroh ki jingpynngat kyndon ïa ki dkhot ka seng HNLC u bah Kharkrang u la jubab “ Ngim don ei ei ban kynthoh na ka liang jong ngi”.
Na ka liang ki nongïalam ka seng HNLC ki la buh ïa kane ka jingdawa hakhmat ka miej jingïakren ba la ïadon lang da u Ksiang na ka liang ka sorkar u bah Peter S Dkhar, u Advisor ka MHA ba peit ïa kane ka thaiñ shatei lam mingi u A.K Mishra ha ka jingïakynduh ba nyngkong ha ka 24 tarik Jylliew 2023.
Na ka liang ka seng ka dawa ba donkam ïa ka jingmab jongka sorkar ïa ki jingshah pynngat kyndon khnang ba ka jingkren ïasuk kan ïaid shakhmat.
Ha kaba ïadei pat bad ka hukum jongka ïing bishar Supreme Court ban ai jingtip halor ki mukotduma pyrshah ïa ki MP bad MLA kiba dang sahteng, u bah Kharkrang u la ong ba ka Party kam kwah ban kynthoh ei ei kaba long pyrshah ïa ka ïing bishar. Ki jingtohkit ki la ïaid ki jingshah pynngat kyndon la dep leh bad mynta ka dang ïaid ka jingbishar kumta kum ka party kam kwah ban kynthoh ïa kano kano ka kam kaba dang don ha ka jingbishar jong ka ïing bishar.
