Hap pyndem ka ECI ha ki Mizo, pynkynriah tarik ñiew vote na ka Sngi U Blei

By Mawphor News Desk On Dec 2, 2023

Electronic Voting Machine, EVM with male hand voting sign pressing button casting vote Indian election 3D illustration

New Delhi, Nohprah 02: Ka Election Commission of India (ECI) ka la hap bam pyndem ha ka jingpynbor jong ki paidbah Mizo, haba mynta ka sngi, ka la rai ban pynkynriah noh ïa ka sngi ñiew vote na ka 3 sha ka 4 tarik, namar ba ka 3 tarik kadei ka Sngi U Blei.
Ha ka Notification ba la pynbna mynta ka sngi, ka ECI ka la ong ba namar ka la mih ka jingpyrshah na kiba bun ki liang ban ñiew vote ha ka Sngi U Blei, kumta kum ka dak ka jingburom ïa ka jingsngew jong ki paidbah Mizo, ka ECI ka la pynkynriah noh ïa ka jingïañiew vote sha ka 4 tarik, kaba dei ka sngi nyngkong. Ka jingñiew vote na ka bynta kiwei pat ki saw tylli ki jylla, kata ka Madhya Pradesh, ka Rajasthan, ka Chattisgarh bad ka Telangana, ka jingñiew vote kan dei beit 3 tarik.
Ka Mizoram naduh ba la pynbna ban ñiew vote ha ka Sngi U Blei, ka la ïeng beit triang ban pyrshah da kaba ong ba ka Sngi U Blei kadei ka sngi ba kyntang na ka bynta jong ki ba kin nym ïashim bynta ha ka jingïañiew vote. Nalorkata ki Balang Khristan ruh ki la pynlong ka jingduwai ba kyrpang ban pynkynriah noh na ka jingñiew vote ha ka sngi U Blei.