Nongpoh, Ïaiong 03: Hapdeng ka jingshong kun bad iphuh iphieng ka All Meghalaya Karbi Association (AMKA) mynta ka sngi ka la pynkut noh ïa ka jingrakhe jong ka jingïaid lynti ba 50 snem jong katei ka kynhun ki Karbi ha ka jylla Meghalaya naduh bala seng ïa ka ha u snem 1975, ha ka jingïalang kaba shongkun ha Purduwa, Ri-Bhoi District.
Ha kane ka jingpynkut noh ïa katei ka jingrakhe lehkmen ba 3 sngi lynter la wan ruh ban shim bynta bad ai mynsiem da u Myntri Rangbah ka jylla u Conrad K Sangma kum u kongsan u ba la ai ka jingïaroh kaba khraw ïa katei ka kynhun kaba don ka jingtylli khamtam ban pynneh pynsah ïa ki riti dustur, ha ka jingdon lang u Bah Mayral Born Syiem MLA ka Nongpoh, Bah Charles Marngar MLA ka Mawhati, Bah Isynei Hinge EM ka KHADC, ka kong Rona Khymdeit MDC ka Nongpoh, u Avijit Kro Deputy Chairman ka KAAC, ki nongïalam ka AMKA naduh u Bah Robert Jones Ronghang President bad kiwei kiwei ki nongïalam ka AMKA, ki nongïalam shnong lem bad ki hajar ngut ki paid Karbi na kylleng ka jylla Meghalaya.
Ha katei ka sngi la pynphuh pynphieng ruh da ki jingshad tynrai bapher bapher bala pyni nam da ki khun samla Karbi halor ka jingriewspah ka kolshor tynrai, bad kumjuh ruh ki riam ki beit tynrai, ryngkat ka jingpyndon burom ïa baroh kito kiba la don bynta ban thaw ïa ka kynhun jong ka AMKA na ka bynta ka jingïeid, ka jingtylli bad ka jinglong kawei jong ki paid Karbi ha ka jylla Meghalaya kumba ki long mynta bad ha kajuh ka por la ïoh ruh ban plie ïa u maw tablet kum ka dak ka jingsah kynmaw jong ka jingrakhe ïa ka jingdap 50 snem jong ka AMKA.
Haba kren ha kane ka sngi na ka liang u Conrad K Sangma u la ai jingïaroh ïa ka AMKA naduh ki nongïalam kiba mynshuwa kiba la don bynta ruh ha ka jingïakhun ban ïoh ïa ka jylla ba pura, ba katei ka kynhun ka long kumba ka long mynta na ka bynta ban kyntiew ïa ki paid Karbi kiba shong ba sah ha ka jylla Meghalaya.
U la ong ruh ba ka sorkar MDA kam don ka jingshah shilliang ha kaba ïadei bad ki skhim pynroi hynrei ka pynpoi lut sha baroh kiwei pat ki jaitbynriew kiba im ha ka jylla Meghalaya naduh ki Rabha, Koch, Hajong bad kumta ter ter, kumjuh ruh ki jingeh ba ki mad na ka por sha ka por namar ngi leh ïa kaei kaba ngi kren.
Na ka liang u myntri rangbah ka jylla u Conrad K Sangma mynta ka sngi u la pynbna ruh da ka song jingïarap ba 55 Lakh tyngka sha ka All Meghalaya Karbi Association kaba dei ruh hadien ka jingjem ka sur khroh jong u Bah Mayral Born Syiem MLA ka Nongpoh u ba la khroh jai da ka sur kaba jem bad u ba lah ruh ban pynngeit.
Lyngba katei ka 55 lakh kaba u Myntri Rangbah u la mang ban ai sha ka AMKA 5 lakh ka dei na ka bynta ban ïarap ïa ka jingrakhe dap 50 snem jong ka AMKA bala mang lyngba ka Chief Miniter Special Grant, bad 50 lakh ban tei ïa ka Cultural Centre namar ka jaitbynriew kaba khlem ka riti dustur ka dei ka jaitbynriew kaba thylli bad lyngba katei ka centre lah ban pynim ïa ka riti ka dustur ka kolshor tynrai bad khamtam ki khynnah ha kane ka juk ba mynta kin tip bad nang ban bud ïa kaei kaba u mynbarim u la hikai.
