Shillong, Ïaïong 03: Ka jingjyllei jong ki nongkhrong ha ka jylla katba dangmih ki sngi ka la long kaba shyrkhei ha kaba kine kim salia wat ban shna ïa la ki jong ki ïing ki sem kiba shu shna dara bad wat ïa ki jaka leitbar kiba imat ki khlem da la ïoh ki jingbit.
Ha ka jingleit jingjurip u nongthoh khubor la lap ba ha lum Syrvey ki la don ki bar jylla kiba dei ki nongkhrong ki la shna wat ïa ka jaka leitbar kaba don ha jrong jong kawei ka dukan sha dairy.
Kane ka jingshna ïa kane ka jaka leitbar ka la ktah bha namar ka um jaboh kaba tuid na kane ka jaka ka la mih shabar jong ka lynti ïaidkjat kaba ki paidbah ki pyndonkam.
Ha kane ka dangshen na ka liang jong u MLA ka South Shillong u la ujor ruh sha u CEO ka Cantonment Board halor ka jingbun palat ki bar jylla kiba sah beaiñ ha kane ka jaka bad kumjuh ruh kiba ju pynmih ïa ki kam sniew kiba har rukom bad na ka liang u CEO ka Shillong Cantonment board u la kular ban shim khia ha kaba ïadei bad kane ka kam.
Hynrei kan long pat kaba sngewsih ba haduh mynta na ka liang jong ki bor ba dei peit kim pat lah satia ban shim khia halor kane ka kam, kumta na ka liang jong ki paidbah kiba ïaid ba ïeng na kane ka lynti ki la pynpaw ka jingkhñium halor kane ka jingkharoi ki bar jylla bym ithuh ithaw shuh bad lada ki bor ba dei khmih kim lah ban shim khia halor kane kan long ka jingma ïa ka jylla baroh kawei kumta donkam ïa ki bor ba dei khmih ba kin shim khia noh mar dor halor ka kam bad ka jingkharoi ki bar jylla bad khamtam kiba wan sha kane ka jylla ban khrong ha kaba ym lah ban tip ki wan naei.
