Shillong, Rymphang, 14: Ki don palat 500 tylli ki skul ha Meghalaya ki bym pat shah kynthup ha ka Unified District Information System for Education (UDISE) jong ka Sorkar.
Haba pyntip ïa kane hadien ka jingïalang pyrkhat kam, u State Project Director ka SSA u Swapnil Tembe u la ïathuh ba kine ki 500 tylli ki skul ki dei ban shah kynthup hapoh ka UDISE namarba ka dei ka kyndon jong ka Sorkar India ban ithuh ïa manla kawei pa kawei ka skul kaba don hapoh ka ri.
Kawei pat ka mat ïakren kaba ar ka long ba ki don haduh 500 tylli ki skul ki bym pat ïoh jingithuh.
U Tembe u la ong ba ka jingithuh ka mut ba ki skul ki dei ban ïoh ïa ki kot ki sla na ki ophisar sorkar shwa ban pyntreikam.
“Ki don katto katne ki kot ki sla ïa kiba la ai da ka sorkar, kum ka nuksa, ki Elementary Schools ki DSCO ki dei kiba hap ban ai ïa ka jingithuh. Ka lah ban long ka jingai jingbit ban plie skul, ka lah ban long tangka jingithuh ba tang shipor, ka lah ban long ka jingithuh kaba long junom hynrei kaba sngewsih ka long ba ki don ki jingjia ha ki snem ba la leit noh ba ki don ki skul ki bym pat ïoh ïa ka jingithuh ki plie beit shaid shaid,” ong u Tembe.
U Tembe u la ong ba ka Sorkar India ka la bthah ïa baroh ki sorkar jylla ban shimkhia bha ïa ki skul ki bym pat ïoh jingithuh.
“Na kata ka daw ngi la bthah ïa ki ban leit bad ban pynshisha ïa ki jingdonkam ba kongsan khnang ba kin dup ïoh jingithuh,” u la bynrap.
U la bynrap shuh shuh ba ka tnat Pule Puthi shen kan sa pynmih ïa ka Standard Operation Procedure sha baroh ki kynhun ba ki dei ban bud shwa ban plie ïa ki skul.
“Lada don mano mano ba kwah ban pynsdang ïa ka skul kin hap ban ïoh shwa ïa ka jingbit, kin hap ban pyni ïa ka iing skul bad hadien kata kin sa ïoh ïa ka jingbit bad nangta kin sa lah ban pyntyllun shakhmat. Hadien lai snem lada ki leh bha, lada ka kiew bha ka jingdon jong ki khynnah skul, yn ai syndon da ka jingithuh kaba long shi junom lane ka Certificate of Recognition bad yn sa ai ruh ïa u UDISE Code,” la ïathuh u Tembe.
