Buh thong ka NPP ban wanrah ki aiñ ban ïada ïa ki trai ri trai muluk, ong u Bah Prestone

Shillong, Rymphang 14: U State President ka National People’s Party (NPP) bad u Symbud Myntri Rangbah ka jylla u Bah Prestone Tynsong u la ong ba ka parti jong u ka buh ka thong ban wanrah ki aiñ kiba treikam na ka bynta ban ïada ïa ki trai ri trai muluk jong ka jylla baroh kawei.
Ïa kane u la kren ha ka jingïalang kaba pan ïa ka jingkyrshan na ka bynta u MDC ba mynta u Bah Batskhem Ryntathiang.
Halor kane u Bah Tynsong u la ong ba ka NPP ka angnud ban wanrah ïa ki kam pynroi ha kiba bun ki liang na ka bynta ka bha ka miat jong ki trai ri trai muluk jong ka jylla.
Haba ai khublei ïa ki paidbah na Khasi bad Jaiñtia ba ki la ai ka jingkyrshan ïa ka party kiba la ai lad ruh ïa ka party ba kan ïalam ha KHADC bad JHADC, u Bah Prestone u la ong, “Ngin wanrah ïa ki aiñ kiba lah ban ïada na ka bynta ki trai ri trai muluk bad ka bha ka miat jong ki nongshong shnong bad kumjuh ruh kiba don jingïadei bad ki bor pynïaid shnong.”
Haba ong ba ki la don bun ki aiñ ba la ïoh jingmynjur ba la wanrah da ka KHADC khamtam ha kaba ïadei bad ka lineage act, u la ong ba kane ka kane ka long kaba kongsan bha na ka bynta ban ïada ïa ki trai ri trai muluk jong ka jylla.
“Nga kyrpad ïa ki paidbah nongshong shnong ba kin kyrshan ïa ka NPP bad ban thep ïa ka vote jong ki ha u kyrtong jong ka seng u bah Batskhem Ryntathiang khnang ba un lah ban shakri ïa ki paidbah jong ka Mairang constituency ha ka lynti kaba bha,” u la ong.
Haba pynrem ïa ki jingkynthoh kiba ïalam bakla ïa ki paidbah da kaba kynnoh ba ka NPP kadei ka BJP, u deputy CM u la ong, “Shah ïa nga ban ïathuh ba ïa ka NPP la thaw da ki nongïalam kiba la khraw pyrkhat bha kiba kynthup kum ïa u (L) PA Sangma, uba la long u Lamphang barim ka Lok Sabha na kane ka thaiñ.”
U Bah Tynsong u la ong ba ka sorkar ka la wanrah bun ki skhim na ka bynta ban shim khia ha kaba ïadei bad ka ïohkam ïohjam bad kiwei kiwei ha kaba ki paidbah ki kin hap ban wad ïa ki kam lyngba ka jingwad jingtip na ki ophis BDO.