Ujor ejahar u Myntri sorkar pyrshah ïa ka Garo Hills Times ba kynnoh ba u shah siat

Shillong, Rymphang 14: U Myntri Sorkar jylla u Marcuise N Marak ula ujor da ka ejahar pyrshah ïa ka social media page “The Garo Hills Times” namar ka jingpynsaphriang ïa ka khubor lamler bad khubor shna hi ba kynnoh ba u la shah siat iap (assassinate) kaba la mih ha kine ki sngi.
Ha kaba iadei bad kane ha ka jingujor ba la aiti sha u Superintendent of Police, East Garo Hills,u Myntri ula ong ba ha ka 13 tarik Rymphang 2025, kane ka lad pathai khubor kala kam thok ba ula shah siat ïap bad ba ka kynhun Garo National Liberation Army (GNLA) kala shim ïa ka jingbah khlieh ïa kane ka kam.
“Ka jingpynsa phriang ïa kum kine ki khubor lamler ka dei tang ka jingpyrshang ban pynsyier bad pynrit mynsiem, ïalam bakla ïa u paidbah bad pynthut ïa ka shongsuk shongsaiñ,” ong u Marcuise ha ka ujor.
“Kane ka khubor lamler ka la buh ha ka jingma kaba khraw hakhmat u paidbah bad ba dei ban leh da kaba tyngeh” bynrap u Myntri.
U Marcuise ula kyntu ïa ki Pulit ba kin pynlong mar mar ïa ka jingtohkit bad ban leh eiei kat kum ka aiñ pyrshah ïa kito kiba donkti ban pynsaphriang ïa kane ka khubor lamler.
U la pyndait lang ruh ïa ka jingthoh ka “The Garo Hills Times” kum ka sakhi bad kyntu ban shim ïa ki sienjam kiba tyngeh ban tehlakam ïa kum kine ki kam thok kam shukor hadien habud.
Lah ban pynkynmaw ba ka “The Garo Hills Times” ha ka sngi Palei ka la kam thok ba ka GNLA ka la siat ïap ïa u Myntri Sorkar bad MLA ka Williamnagar Marcuise N Marak.