43 ngut ki kyrtong ïakhun elekshon MDC sha JHADC ki ban aireng na East Jaitia Hills

Khliehriat, Rymphang, 04: Ki don 43 ngut ki kyrtong na ki seng saiñpyrthei bapher bapher bad kynthup ruh ïa ki kyrtong shimet kiba la thep kyrteng ban ïakhun ïa ka elekhson sha ka Jaiñtia Hills Autonomous District Council (JHADC) na ki shiphew tylli ki Constituency kiba kynthup ka Muthlong Sohkymphor Constituency, Tuber Wapungshnong Constituency, Rymbai Khliehriat Constituency, Sutnga Nongkhlieh Constituency, Saipung Nongkhlieh Constituency, Musniang Rangad Constituency, Bataw Lakadong Constituency, Narpuh Constituency, Sutnga Narwan bad ka Sumer Constituency.
U kyrtong ka HSPDP na Narpuh Constituency Bah Wanshwa Nongtdu haba kren sha ki lad pathai khubor u la ong, “nga kyrpad ïa ki nongshong shnong kiba la kynjoh ïa ka rta kaba 18 snem shaneng lada phi ibit ïa nga ba ngan long uta u nongmihkhmat na ka thaiñ sngewbha ban ailad ïa nga bad lada phim pat ibit ruh ngam sngew eiei. Hynrei haba nga phai sha ka thaiñ Narpuh nga ïohi ba ka la nang ngam bad ka la nang lut bad ka la nang syllen. Haba peit tang ïa ka surok National Highway-6 ruh kaba buh jingeh. Kumta nga kwah ban ong, lada ki kwah ïa ka bha ka miat ha ka thaiñ sngewbha jied ïa nga ha kane ka kynti.”
U kyrtong ka NPP na Musniang Rangad Constituency Bah Phasmon Dkhar, u la ong “nga kynrpad ïa ki paidbah kiba kyrshan ba kin don kajuh ka sur bad ka jingïaineh hynrei ym dei ban shat jingmut shane shatai da kaba peit bad bishar ïa ki kam kiba nga la trei. Ha kaba ïadei bad kane ka elekshon nga kyrpad ïa ki paidbah ban pyrkhat bha namarba ka Sorkar kaba ïalam mynta hapoh ka jylla ruh ka dei ka NPP. Kumta nga kwah ba ngin ïoh ka bor shynshar ha Jaiñtia Hills Autonomous District Council khnang ban yn dup lah ban wanrah ïa ki jingmyntoi bapher bapher sha ki shnong ki thaw namarba lada pher ka jingsynshar hapoh ka Council ka jingduhnong ka dei hi ïa ki paidbah. Ki jingshah kynnoh kin don beit hynrei kane ka party ba la ïalam da u Conrad Sangma ki don bun ki jingmyntoi kiba poi sha ki shnong ki thaw.”
U kyrtong jong ka VPP na Musniang Rangad Constituency Bah Damewanhi Rymbai u la ong , “ngi ieh sa ha ka jingstad jong ki paidbah ba kin jied ha ka 21tarik bad ngim don kano kano ka jingartatien ba ha ka 24 tarik ki paidbah kin shad kmen ha kaba baroh ki kyrtong kin ïoh ïa ka jingjop. Nga ai ka jingkitbok kitrwiang ïa baroh ki kyrtong bad kumjuh ruh ki paidbah jong ki Constituency ba kin ai ka jingkyrshan kaba khlaiñ ïa baroh shiphew ngut ki kyrtong jong ka party.”
U Bah Wailaddameshwa Siangshai uba long u kyrtong jong ka UDP na Musniang-Rangad Constituency u la ong “nga angud ban long u nongshakri ïa ki paidbah ban peit ïa ka khia ka shnon jong ki paidbah hapoh ka Constituency bad khamtam eh haba nga ïohi ïa ka jinglong jingman jong ka JHADC kaba don ha tmier ka jingma. Kum u samla nga sngewba ka dei ka kamram jong nga ban mih shakhmat ban tyrwa ïalade kum u kyrtong u ban ïakhun ïa kane ka elekshon khnang ba lada nga poi sha ka thong ngan trei shitom na ka bynta ka bha ka miat jong ka Council khamtam ban pynkhie im biang ïa ka District Council namarba ha ki por kiba la leit nga ïohi ba ka District Council ka shem shitom bha ban siew tulop wat ki nongtrei jong ka. Lada nga poi sha ka thong ngan shimkhia ban ïa pynbeit ïa kane ka kam bad ngan trei hok ruh ïa la ka kam.”
Ka MDC barim jong ka Rymbai-Khliehriat ka kong Violet Lyngdoh kaba ïakhun biang ha kane ka kynti kum ka kyrtong shimet ka la ong ba ka jingïakhun biang ïa ka elekshon MDC ka long namarba ka Khliehriat ka dei ka Headquarter jong ka East Jaiñtia Hills District. Donkam ban wanrah ïa ki tnat treikam jong ki ophis kiba don hapoh ka JHADC na ka bynta ban pynsuk ïa ki paidbah ka District ha kaba ïadei bad kino kino ki kam kiba ïadei bad ka JHADC.”
Ka pynpaw ruh ka jingsngewkhia halor ka jingshah iehbeiñ ka Town Committee kaba dei ka komiti ba kaba khmih kyrpang ïa ka khuid ka suba. “Nga don ka jingangnud ban pynkhie im biang ïa kane ka Town Committee kaba don hapoh ka District bad lada shah ka lad ngan ïaleh ruh ban pynhap lang sa ïa kiwei kiwei ki shnong ruh bak in hap hapoh ka Towm Committee kum ka Ladrymbai, ka Byndihati, Nongthymme bad Kairang,” ka la ong.
“Ka don ruh ka ïew ha Khliehriat ba ju tip ruh kum ka ïew Pangkad kaba peit bad khmih da ka District Council bad ka la shah ieh beiñ namarba ym don jingïoh na ka Council. Ynda nga poi sha ka thong ngan kren ïa kane ka mat hapoh ka Council” ong ka Kong Violet.
U Bah Desous Pohshna u ban ïakhun na Narpuh Constituency u la ong, “ha u snem 2014 nga la long kum u MDC bad ha u 2017 kum u CEM. Ka jingkwah jong nga ban ïakhun biang ka long ba nga ïohi ïa ka jingtlot ki bor jong ka JHADC bad ka jingangnud jong nga ka long ban nang pynkhlaiñ shuh shuh ïa ki bor jong ka District Council namar ha ka por ba nga dang long MDC ngi ïohi ba ka Sorkar ka la pynmih ïa ka Ordinanace na ka bynta ki Waheh Shnong bad ngi la ïaleh shitom ban thaw ïa ka Aiñ-rew na ka bynta ki Waheh Shnong bad mynta ka la long aiñ. Ki dang dang don shibun ki aiñ kiba ïadei bad ka khyndew ka shyiap ruh bad kiwei kiwei kiba dang donkam ban pynbit pynbiang bad pynbha shuh shuh bad lada ki paidbah ki dang pynjop ïa nga ha kane ka kynti kine baroh yn pynurlong khnang ban pynkhlaiñ bad pynbha ïa ki aiñ kiba don hapoh ka Sixth Scheduled.”
U kyrtong shimet uba ïakhun na Bataw Lakadong Constituency Bah Marshall Biam u la pynpaw ka jingsngewkhia halor ka jingshah iehbeiñ jong ki shnong kiba don ha ki thaiñ khappud namarba hapoh kane ka Constiyuency ki don bun tylli ki shnong kiba don ha khappud.
“Nga thrang naduh mynsiem ban wanrah ïa ka roi ka par hapoh ka Constituency namarba dang bun ki jingduna bad bun ki nongmihkhmat kiba ju mih na kane ka Constituency kim ju kham shimkhia ïa ki shnong ha khappud. Lada nga jop ngan ïakhun ban rat dyngkhong ïa ka bamsap, ïa ka jingsahdien jong ki shnong ki thaw namar nga isynei ïa ki paidbah, nga synei ruh ïa kito ki nonghikai skul jong ka District Council ki bym ïoh tulop bad kumjuh ruh ki nongtrei ka District Council ki bym ïoh tulop. Ka donkam ïa ka jingïatreilang bad kumta nga kwah ban ïatreilang ban kyntiew ïa ki shnong bad ruh na ka bynta ban pynkhlaiñ ïa ka Sixth Scheduled,” ong u Bah Marshall.