Lada ym lah pynurlong ïa ki jingdawa ka seng kan sdang biang ïa ka jingïakhih

Khliehriat, Nailar16: Ha kaba ïadei bad ki jingdawa ba la buh hakhmat ka sorkar, ki jingdawa ba ïadei bad ka public hearing jong ka company Shree Cement, ka Jaiñtia National Council ka la ai por shiphew sngi ïa ka sorkar bad lada ka sorkar kam lah ban pynurlong ïa ki jingdawa ka seng ka bteng biang ïa ki jingiakhih.
Lyngba u kyrwoh ba la phah lyngba u President Rangbah ka Jaiñtia National Council Central Executive Committee, u bah Sambormi Lyngdoh, la ong ba ka seng hadien ba la iohi ïa ka statement ne jingkren jong u myntri Rangbah ka jylla u Conrad Sangma ba la kren halor kato ka public hearing kaba dang shu dep ha East Jaiñtia Hills ha kaba u la ong ba ka sorkar ka la dep ban phah ïa u DC ban leh ïa ka jingtohkit halor kaei kaba la jia khamtam halor ka jing khlong ïa ka surok PWD da ki nongkyrshan ka Shree cement, u la ong ruh ba ki don ki paidbah kiba kmen halor kato ka public hearing, hynrei kumba ka paw hi shabar ba don shibun bah kiba pyrshah bad kiba shah khanglad ruh ban leit sha ka public hearing ban iashim bynta bad la iohi ruh ïa ka jingshah leh donbor bad shah thombor jong kiba bun da kaba pyndonkam da ki bor pulit bad ki local mafia jong ka Shree cement”
“Ngi iohi ruh ba halor kane ka mat jong ka Shree cement, u myntri rangbah ba donburom jong ngi ula ai bun ki statement ne jingkren hynrei kaba sngewsih pat ba tang shisien ruh ngim ju iohi ba un kren shaphang ka jingleh donbor bad jingshah knieh jubor jong ki trai jaka bad ki nongrep ha uto u lum Syrman.Dang ha kine ki sngi na ka liang jong ka seng ha ka 13 tarik une u bnai ka seng ka la dep ban ai jingthoh sha u myntri rangbah ka jylla bad ka seng ka la kren halor ki ar tylli ki jingdawa kata kaba nyngkong ka long ban wad ïa ki lad ki lynti ba kumno ban ïarap ïa kine ki nongrep ki ban shah ktah na ka jingpyntreikam ïa ka mining project ka Shree cement ha u lum Syrman lada ïaid shakhmat bad ban ai ïa ka hok ba pura sha kine ki trai jaka kiba dei hok ban ioh bad ka seng ka la ai por ruh ïa ka sorkar haduh 10 Sngi bad hadien ka shiphew sngi lada ka sorkar kam leh eiei na ka liang ka seng kan sa bteng biang ïa ki jingiakhih halor ki jingdawa ki jong ngi lyngba ki jingiakhih bapher bapher”
“Ngi kum ka seng kaei kaba ngi kwah ban pynpaw hangne bad ban phah kane ka kyrwoh sha u myntri rangbah ka jylla jong ngi ba ka jingdawa hi ka jong ngi kata naduh naba sdang ba ngi ka JNC ngi ieng ha ka nongrim, kata ym na ka bynta ka Shree cement ne ym na ka bynta kano kano ka company, hynrei ka nongrim hi ka jong ngi kaba shai kata ba u “Lum Syrman” hi u dei ka jaka rep ïa ki spah tylli ki longïing jong ki nongrep bad ki shaniah ïaka jakpoh jong ki na une u lum Syrman bad kaba ar ki don da ki spah ngut ki trai jaka kiba la long trai ha uto u lum Syrman, hynrei ka jingkylli hi ka long mynta ba mano ban bahkhlieh ïa kine ki jingjia ?Mano pat ban ai ïa ka hok kito ki nongrep bad mano ban ai ïaka hok ki trai jaka hangto ha u lum Syrman????” pynpaw ka JNC.
“Kumba ka jingiakhih ka jong ngi naduh ba sdang halor ki trai jaka bad ki nongrep, naduh kato ka rally ba la pynlong ha Shillong, ngi la kren shai sha ka sorkar ba ka jingialeh ka jong ngi kam dei bad ka Shree cement hynrei ka dei beit bad ka sorkar namar ngi sngewthuh shai kdar ba lada ka sorkar kam don liang bad kane, ka Shree cement kam ym nud ban leh ïa kine ki kam Thombor, te ngi kum ka seng ngi kwah baka sorkar ha shwa ba kane ka shiphew Sngi kan kut ka sorkar kadei ban leh eiei halor kine ki jingeh jong ki trai jaka bad ki nongrep ba ki iakynduh namar lada ka sorkar ka sngap jar kumne te ka jingkylli pat ka long ba shaei ngin dawa ïaka hok ka jong ngi lada ngim mih ha surok lada ngim iaid daka lynti ka jingiakhih, te ka khubor kaba shai sha ka sorkar ba wad ïa ki lad ki lynti ba kumno ban wanrah ïaka synshar kaba khuid ka jingbishar kaba hok ïa kine ki trai jaka bad ïa kine ki nongrep ha elaka Nongkhlieh khamtam kito kiba don jaka rep ha u Lum Syrman”pynkut u kyrwoh.