SHILLONG, Naitung 26: Ka Nongmynsong SC, ka kynhun ba shah thup ha ka Group-A, ka la ïoh ban sdang ïa ka lynti ïaid jong ka ha ka lympung phutbol kyrdan 3rd Division 2024 ba la pynïaid da ka Shillong Sports Association da ka namjop ha ka jingïalehkai kaba long hynne ka Sngi Thohdieng ha SSA Ground, Polo.
Kane ka namjop ka la wan hadien ba ka Nongmynsong SC ka la lah ban pynliem noh ïa ka Lapalang SC ha ka jingïakhun kaba itynnat da 3-1 kol. Ka Nongmynsong SC ka la plie pyrda ïa ka kol ba nyngkong tang hadien 9 minit ba la ïa ka por na u Batskhem Jyrwa, shuwa ba u Banhunlang Marbaniang un pynbud sa ar kol ha ka kylla step bad kawei ha ka kylla miet (13 & 60 minit).
Na ka liang jong ka Lapalang SC ka la ïohlad ban pynphai shi kol lyngba u Sonjalen Haokip ha ka 78 minit hynrei ka por ka la lyngkot eh ïaka kynhun kaba la pynlong ïa ka ban mad ïa ka namrem.
