Mawkyrwat, ‘Nailur 05: U Myntri Shnong jong ka Shnong Mawkyrwat, u bah R.R. Lyngkhoi ha ka sngi Saitjaiñ u la plie paidbah ïa ka jaka saitjaiñ ha Phot Mawpon, South West Khasi Hills District ba la pyntrei da ka skhim MGNREGS jong u snem 2021- 2022 napoh ka ophis jong u Block Development Officer, Mawkyrwat C&RD Block, South West Khasi Hills District, ha ka jingmang pisa kaba T. 33,08,435 lak ba la sdang pyntrei naduh ka 17 tarik, Nailar, 2021 bad la pyndep ha u bnai Rymphang, 2022.
Ïa kane ka jaka saitjaiñ yn plie naduh ka por 7:00 baje mynstep haduh 7 :00baje janmiet bad na ka bynta ki nongwan saitjaiñ yn lum T. 20 uwei ne kawei ka briew.
Katkum ka jingpyntip jong ka shnong Mawkyrwat ba ïa kane ka jaka saitjaiñ la aiti ha ka Seng Samla Shnong Mawkyrwat ba kan long ka nongpynïaid bad ka jingshim pisa ïa ki nongwan saitjaiñ ka dei namar ba lyngba kata ka pisa yn pyndonkam ha ka ban siew tulop ïa u nongap uba long ruh ha ka juh ka por u nongpynkhuid ïa ka jaka saitjaiñ.
Haba kren ha kane ka sngi, na ka liang u Myntri Shnong jong ka Shnong Mawkyrwat, u bah R.R. Lyngkhoi u la pynpaw ka jingaikhublei na ka bynta baroh ki paidbah nongshong shnong kiba la long ka jingjop bad ban pynurlong ïa kane ka jingthmu ba bha kaba long ka jingangnud naduh ki por kiba la leit. “Ka jingplie ïa kane ka jaka saitjaiñ ka long ruh kum shibynta ban tehlakam bad ban ïada ïa ka jingjakhlia jong ki wah kiba don hajan kata ka Phot Sala, Phot Umnew, ka Phot Mawpon bad ki Phot kiba kham harum”, u la ong.
Haba bynrap ïa ka jingkren u Myntri Shnong u la pynpaw ka jingaikhublei kaba kyrpang na ka bynta ïa ka kong Isawanda Laloo, IAS, Deputy Commissioner, South West Khasi Hills District bad kumjuh ruh ïa u Block Development Officer barim jong ka Mawkyrwat C&RD Block, u bah F.B. Basan, MCS namar dei lyngba ki jingai jingmut jong ki bad ki jingïamir jingmut lang ha kaba la lah ban pyntreikam bad tei ïa kane ka jaka saitjaiñ.
Ha kawei pat la liang u la kyrpad na ka bynta ki paidbah nongshong shnong bad ïa kiwei de ki shnong kiba mar jan ba haba ki wan saitjaiñ hangne ki dei ban ai ka jingïatreilang ban wanrah ïa ka khuid ka suba bad ruh khnang ba ka jingkwah jong ka Shnong bad ka Seng Samla Shnong kin long kiba jop.
Kiwei pat ki nongkren ha kane ka sngi ki long ka kong Mattibakorlin Nongsiej na ka Seng Longkmie, u bah J.F. Iawphniaw na ka VDP, u bah Mihsalan Turnia na ka VEC, bad u bah W.L. Snaitang, Secretary Shnong Mawkyrwat.
Ha kane ka sngi la pynïaid ïa ka jingïalang da u bah Kitborlang Lyngdoh, President jong ka Seng Samla Shnong Mawkyrwat bad ka jingkren khublei na u bah Skhembor W. Nongrum, Vice President jong ka Seng Samla Shnong Mawkyrwat.
Hadien ka prokram la ïoh ban pynlong ïa ka jingïathung ïa ki tynrai dieng ha ki rud ki kiar jong ka jaka saitjaiñ bad harud jong ka Phot Mawpon.
