300 klur u drok kurup ki Pulit ha u 2022-2024, shah kem 610 ngut ki snar khaïi drok

Shillong, Lber, 5: U drok uba shongdor palat T. 300 klur la kurup da ki Pulit ka Jylla Meghalaya hapoh ar snem la ïathuh u Director General of Police (DGP) Dr. LR Bishnoi bad ong ruh ba kane ka jingeh ka dei kaba khia bha namarba ka jylla Meghalaya ka dei kaba ïajan tam bad ka Golden Triangle.
“Jan T. 300 klur u drok la ïoh kurup hapoh ki ar snem ba la leit noh. Ha kine ki ar snem u drok uba shongdor 75 klur la ïoh kurup hapoh u snem 2022. Nangta sa 170 klur hapoh u snem 2023 bad sa 21 klur hapoh ki ar bnai jong u snem 2024,” la ong u Bishnoi ha ki lad pathai khubor.
Haduh 26 kilo u drok la ïoh kurup hapoh ki ar snem. Kane ka kynthup ïa u drok ba 7.5 kilor ha u snem 2022, 16.3 kilor ha u snem 2023 bad jan 1 kilor u drok ba la ïoh kurup ha u bnai Kyllalyngkot-Rymphang 2024.
Ka jingïohkurup ïa u Ganja ka la long haduh 4,750 kilo ha u snem 2024 (ba la ïoh kurup da ki Pulit ka Ri Bhoi) na ka 1400 kilo ba la ïoh kurup ha u snem 2023 bad 3987 kilo ha u snem 2022.
U DGP u la pynkup burom ruh ïa ki Pulit ka Ri Bhoi halor ka jingïoh kurup ïa u Ganja ha ka sngi u Blei ha Lad Umsaw.
“Ki Pulit ka Ribhoi ki la pynlong ka jingap shrip bad kurup 4750 kilo u Ganja bad ka jingwan rah ïa une u jingdih ka dei na ka jylla Tripura bad nangne la pynrung lyngba ka Meghalaya bad ngi la ïohkem ïa ki runar kiba donkti bad mynta kane ka case ka dang don hapdeng ka jingtohkit,” u la ong.
Ka jingïoh kurup ïa ki dawai kuli Yaba ka la kiew bha ha kaba 19000 tylli ki kuli la ïoh kurup ha u snem 2022, haduh 60,000 tylli ki kuli la ïoh kurup ha u snem 2023 bad 2000 ki kuli la ïoh kurup ha u snem 2024. Ka jingïoh kurup ïa kiwei pat ki dawai kuli jingdih pynbuaid ki long 16928 tylli ha u snem 2022, 32,298 tylli ha u snem 2023 bad 600 tylli ha u snem 2024.
Ha ka sien banyngkong eh, ki Pulit ki la kurup ruh 14.2 kilo u jingdih Crystal Neth uba shongdor T. 1.5 klur.
Shuh shuh, haduh 116 tylli ki NDPS case la rejistar ha u snem 2022 bad kane ka la kiew sha ka 189 ha u snem 2023 katba haduh 13 tylli ki case ladep ban rejistar ha ki ar bnai jong une u snem 2024
Palat 610 ngut ki briew ki la shah kem naduh u snem 2022 haduh u snem 2024. Na kine, 234 ngut kiba la shah kem ki long ha u snem 2022, 355 ngut ha u snem 2023 bad 25 ngut ha u snem 2024. 10% na kiba la shah kem ki dei ki kynthei kiba donkti ban khaii drok.
Kumjuh ruh, 19 ngut la ithuh kum ki briew kiba ïai mlien ban khaii drok, ha kaba 8 tylli ki case jong ka PITNDPS la phah sha ka kashari bad mynta ka Advisory Board kan sa shim ïa ka rai, la ong u Bishnoi.
Haba pynpaw ïa ka jingisaitmet jong u dang dei ka kam kaba jwat bha ha Meghalaya, u DGP u la ong, “kane ka dei na ka daw ba ka jylla Meghalaya ka ïajan bha bad ka Golden Triangle. Mynshwa, ka dei ka lynti ïaid, hynrei mynta ka ka long ka pdeng khaii.”
U la ong ba ka jingdon jong ki nongdih drok ha ka jylla ka la nang kiew bad kane ka la pynsngewkhia bha ïa kiba bun.
“Ban ïakhun ïa kane ka jingisaitmet, ka tnat Pulit ka la wanrah da ki buit treikam kum ka jingpynshai paidbah khamtam eh hapdeng ki samla da kaba pynlong ïa ki jingpynshai paidbah ha ki skul, ki University bad ka jingïai thwet ïa ki nongkhaii drok ruh ka dang bteng,” la ong u Bishnoi bad bynrap ba ki nongkhaii drok ki dei kiba kiba ïai mlien bad bun na ki kynhun Gang na kiwei ki jylla ki don bynta lang ha kaba ki Pulit ka Meghalaya ki la ïakhun ban pynduhjait ïa ki.
Shuh shuh u DGP u la ong, “ngi la pyndonkam ruh da ki technology ban kem ïa ki nongkhaii drok bad ka tnat CID ka la trei shitom ban pyndonkam da ka technology ban wad ïa ka jingdonkti jong ki nongkhaii drok. Ngi ju ïasam jingtip ruh bad ki jylla ba marjan khnang ban khanglad.”
“Nalor kata, ngi la plie ïa ki Counselling Cells ban ïarap ïa ki lanot dih drok da kaba khot lang ïa ki bahaing hasem. U Myntri Rangbah u dei uba la ai mynsiem bha ban pyllait luid ïa ka Meghalaya na u drok bad ngin dang ïai bteng ban trei shtiom da kaba pyndonkam ïa ka social media,” u la bynrap.
Ha kine ki ar snem ba la leit noh, haduh 28,000 bilor ka dawai jyrhoh la kurup ha u snem 2022, 88000 bilor ha u snenm 2023 bad kumba 112 bilor ha u snem 2024.
Nalor ka pisa kaba T. 36 lak la ïoh kurup ha u snem 2022, T. 45.6 lak ha u 2023 bad T. 60,000 hajar ha u 2024. Ka jingïoh kuru ïa ki kali ha u 2022 ka long 67tylli, 157 tylli ha u snem 2023 bad 12 tylli ha u snem 2024.