Ujor ejahar biang ka kur Kharbani ba shah pynïap dusmon u Macborn Bonnyson

Nongstoiñ, Lber 5: Ka kur Kharbani napoh Pathew Eastern West Khasi Hills ha ka sngi hat majai ki la ujor biang sa kawei ka ejahar halor ka jingshah pynïap dusmon jong u samla Macborn Bonnyson Kharbani, 29 snem karta, kaba la jia ha ka shiteng synñia jong ka 3 tarik mynta u bnai.
Ka jing ujor ejahar ka long ban dawa na ka ki bor jong ka aiñ ban thwet bad kem lut ïa baroh kiba donkti lang ha ka ban pynïap ïa utei u samla.
U Bah S.Kitbok Kharbani uwei na ki samla rangbah hapoh jong ka kur, u la ong ba ka kur Kharbani ka la buh biang sa ïa kawei pat ka ejahar hakhmat ki pulit, hadien ba ka kur ka la ïoh biang sa ki katto katne ki sakhi ba u ba leh ïa kane ka kam pyntriem um dei tang uwei, hynrei dang don shuh shuh kiba donkti.
U la ong ba ka kur ka la ïoh ruh ïa ki phone call record kiba pynshisha ba ki dang shuh shuh sa katto katne ngut ki briew, kiba donkti ha katei ka kam pyntriem pyrshah ïa u Macborn Bonnyson Kharbani. U la ong ruh ba ha ka jingïakren bad ki pulit, ki dang don shuh shuh sa kiwei pat kiba donkti.
Ha ka juh ka por u la kyntu ruh ïa ki paidbah nongshong shnong kiba lah ban ïohi ïa kane ka jingjia, ba kin wan shakhmat ban ïasnohktilang bad ka kur Kharbani, na ka bynta ban rat diengkhong ïa kine ki kam sniew hapoh jong ka dong ka thaiñ baroh kawei.
Ka kur Kharbani ka kyntu ruh ïa ki bor jong ka aiñ ba kin leh da kaba tyngeh, da kaba kin kem lut ïa baroh kiba donkti bad dei ban pynngat bad pynshitom tyngeh katkum ka aiñ.
Ha kane ka jingleit buh ejahar ba la don da kiba haïing hasem jong u samla Macborn Bonnyson Kharbani, la donlang ruh da ki nongïalam bad ki dkhot jong ki kynhun sengbhalang bapher bapher ka West Khasi Hills, kiba la pynpaw ïa ka sur jong ka jingpynrem bad dawa ruh na ki bor jong ka aiñ ban kem bad pynshitom tyngeh ïa baroh kiba donkti.