Ka jingkhang ka dang plie ban bteng ïa ka jingïakren

Shillong, Lber, 5: Ka Deputy Inspector General of Police (TAP) Kong Claudia Lyngwa ha ka sngi Baar ka la ong ba ka jingkhang ka dang plie na ka bynta ka jngïakren ïasuk ka Hynñiewtrep National Liberation Council (HNLC).
Ka la ong ruh ba ki Pulit ki la lap sabut na ka Mobile Phone jong u dkhot ka HNLC ba la shah kem u Bah Storgy Lyngdoh ba u donkti ban dawa pisa na kiba bun ki briew.
Ha ka jingïakren bad ki lad pathai khubor, ka Kong Lyngwa ka la ong ba u Bah Storgy Lyngdoh uba la don bynta ha kynhun ïakren ïasuk jong ka HNLC u la shu rung tuh sha ka jylla Meghalaya na Bangladesh bad ula shah kem ha ki Pulit ka East Khasi Hills.
“Kam don kano kano na ka liang jong ngi ba kane ka jingïakren ïasuk kam dei ban shu kut noh, ka dang dei ban ïai bteng bad ka jingkhang ka dang plie,” ka la ong.
Haba kylli shaphang ki khubor kiba kam ba u Bah Storgy u la wan sha Meghalaya ban pyndem wait, ka DIG ka la ong, “u briew uba la leit phai sha Bangladesh ka pynpaw shai ba lada u kwah ban pyndem wait, u la dei ban sah ha Shillong katba ka HNLC ka dang ïakren bad ka Sorkar bad katkum ka jingïohi jong ngi, ka jingleit phai biang jong u sha ka ri Bangladesh bad wan phai biang na ka Bangladesh, kaei kaba pynpaw, nga ieh ha phi ban sngewthuh ïa kane.”
Ka la ong, “kam don kano kano ka shithi dawa pisa ba u la phah sha ki briew na ka mobile phone jong u, hynrei ki don bun tylli ki mobile number kiba la peit bad ki dei kiba la dawa pisa na kiba bun ki briew.”
Haba pynpaw ba ka jingtohkit kan dang ïai bteng, ka Kong Lyngwa ka la ong, “ka jingïakren ïasuk kan dang ïaid bad lada kino kino ki donkti ha ki kam be-aiñ khlempep ngin hap ban pynshitom ïa ki katkum ka aiñ.”
Shuh shuh ka DIG ka la ïathuh ba katkum ka jingïoh jingtip ka HNLC mynta ka don sa tang 20-30 ngut ki dkhot. “Hynrei, ngim lah ban ong ki tiar kiba kumno ki don hynrei kiba ngi tip ki don tang khyndiat tylli ki tiar siat,” ka la ong.
Bun na ki briew kiba la ïohpdiang ïa ki shithi dawa pisa kim shym la ujor sha ki Pulit.
Ha kaba ïadei bad ka jingpyrshang ban ïoh jingshaniah na ki paidbah ka Kong Lyngwa ka la ong, “ka kamram jong ngi ka long ban peitngor bad kano kano ka jingtip ba ngi ïohlum ngi pyndep mardor khnang ban ïoh ïa ka jingshaniah ki paidbah. Naduh ka por ba ka HNLC ka la mih ha Meghalaya, ki Pulit ki la trei shitom khlem shongthait. Ki Pulit ki la len ïa la ka jingim ha kane ka jingïakhun bad kumba ka long mynta nga ngeit ba phi ïohi ïa ka jingwan ki nongjngohkai pyrthei ka la kylla bha namarba ki Pulit ki la trei la ka jong ka kamram bad ki la len ruh la ka jong ka jingim. Kane ka pynïoh jingshaniah na ki paidbah jong ngi.
Ha kajuh ka por, ka DIG ka la maham ïa ki paidbah kiba noh synñiang ne kiba kyrshan pisa ïa ka HNLC ba shisien ka sngi kin ym lait satia na ki kynjri jong ka aiñ.