Lyngba ka spah ron u Gurung bad u Duhan jop kput ka Rangkynsai ïa ka Raj Bhawan

Shillong, Lber 06: Ka kynhun ïalehkai kriket jong ka Rangkynsai CC hynne ka sngi ka la khur ïa ka jingjop kaba suk hadien ba ka la lah ban pynliem kput ïa ka Raj bhawan haduh 163 ron ha ka lympung lehkai jong ka Shillong Cricket League Super Dicision 2024 . Ki la don haduh arngut ki rangïalehkai ka Rangkynsai kiba khyrwit spah ron ha kane ka jingïakhun.
Haba phai sha kane ka jingïakhun, ka Rangkynsai CC ka la jied ban tied nyngkong hadien ba jop ïa ka toss, ha kaba ka kynhun ka la tied haduh 293 ron na ki 45 over bad shah pynhap 8 ngut.
Ki player kiba seisoh ha ka tied ki kynthup ïa u Ram Gurun u ba la khyrwit palat ïa ka spah ron, kata da 119 ron naki 99 bol, katba u wei pat u ba la kynjoh spah ron u dei u Ajay Duhan da 108 ron na ki 116 bol.
Haba phai sha ki rangkawangbol ka liang pyshah kiba la seisoh ki long u Pankaj Mandol u ba la kawang 9 over, shah tied 53 ron bad khur 5 wicket, katba u Arbin singh u la kawang 9 over, shah tied 80 ron bad ïoh pynhap 2 wicket.
Haba pyrshang ban beh ïa katei ka thong ba la buh ka Raj bhawan ka la shah khanglad noh da tang 130 ron naki 31.3 over hadien ba baroh shiphew ngut ki la shah pynkhyllem. Ki player kiba la ïoh kamai ron kham bun ki long u Rahul shah (32 ron naki 44 bol) bad u Babloo passah (23 ron naki 53 bol).
Dei ki rangkawangbol kiba la tyngshaiñ ha ka pali tied jong ka Raj bhawan, ha kaba u Charm Marbaniang u la ïoh ban khur 3 wicket naki 3.3 over, bad ailad tang 13 ron, nangta u Shavian Blah u la kawang 4 over, shah tied 21 ron bad khur 2 wicket.
ïa ka nam rangïalehkai ba kynsai lane Player off the match ha kane ka jingïakhun la khur da u Ram Gurung u ba la tied 119 ron naki 99 bol kaba la kyrshan radbah ïa ka Rangkynsai ban jop kput haduh 163 ron.